नवी मुंबई : नवी मुंबईतील कामोठे परिसरातील एका शाळेत सहा वर्षांच्या चिमुकल्याला शिक्षकांकडून अमानुष वागणूक दिल्याचा संतापजनक प्रकार उघडकीस आला आहे. पालकांनी केलेल्या तक्रारीनंतर पोलिसांनी दोन शिक्षकांविरुद्ध बाल न्याय अधिनियमानुसार गुन्हा दाखल केला आहे.
कामोठे येथील एका खासगी शाळेत हा धक्कादायक प्रकार घडला असून पालकांच्या तक्रारीनुसार, संबंधित विद्यार्थ्याचा दोन वेगवेगळ्या दिवशी छळ करण्यात आला. १४ नोव्हेंबर रोजी एका शिक्षकाने दुसरीत शिकणाऱ्या एका विद्यार्थिनीला बोलावून सहा वर्षांच्या मुलाच्या गालावर पाच ते सहा चापट मारण्यास सांगितल्याचा आरोप आहे. या प्रकारावेळी संबंधित शिक्षक फक्त उपस्थितच नव्हता, तर तो हसत असल्याचाही गंभीर दावा पालकांनी केला आहे.
यानंतर २८ नोव्हेंबर रोजी इंग्रजीच्या तासादरम्यान दुसऱ्या एका शिक्षकाने याच मुलाला कंपास बॉक्सने मारहाण केल्याचा प्रकार समोर आला आहे. या मारहाणीमुळे चिमुकल्याच्या ओठाला मोठी सूज आल्याचेही तक्रारीत नमूद करण्यात आले आहे.
मुलाने घरी घडलेला प्रकार सांगितल्यानंतर पालकांनी तातडीने कामोठे पोलीस ठाण्यात धाव घेतली. प्राथमिक चौकशीनंतर पोलिसांनी बुधवारी दोन्ही शिक्षकांविरुद्ध गुन्हा दाखल केला आहे. शाळेतील सीसीटीव्ही फुटेज तपासले जात असून, शाळेतील इतर कर्मचाऱ्यांची भूमिका आणि शालेय वातावरणाचीही सखोल चौकशी सुरू असल्याची माहिती पोलिसांनी दिली आहे.
या घटनेमुळे शाळांमधील विद्यार्थ्यांच्या सुरक्षिततेबाबत पालकांमध्ये तीव्र चिंता व्यक्त केली जात आहे. लहान मुलांवर शारीरिक आणि मानसिक छळ करणाऱ्या शिक्षकांवर कठोर कारवाई करण्याची मागणी आता जोर धरू लागली आहे.