सुग्रास सुगरण : गायत्री डोंगरे
डिसेंबरची थंडी म्हणजे फक्त हवामानातला बदल नाही; ती आठवणींची चाहूल असते. सकाळी चुलीवर तापलेलं पाणी, स्वयंपाकघरात दरवळणारा फोडणीचा सुगंध आणि आजीच्या हातची ऊबदार भाजी… त्या चवीत केवळ मसाले नव्हते, तर माया होती.
आजच्या धावपळीच्या आयुष्यात आपण अनेक गोष्टी गमावल्या; पण अशा पारंपरिक रेसिपी अजूनही आपल्याला आपल्या मुळांशी जोडून ठेवतात. ऋतूनुसार शिजवलेलं अन्न शरीराला ताकद देतं आणि मनाला आधार.
ही रेसिपी म्हणजे केवळ पदार्थ नाही, तर पिढ्यानपिढ्यांतून चालत आलेली आठवण आहे-जी आज पुन्हा तुमच्या स्वयंपाकघरात ऊब निर्माण करायला आली आहे.
साहित्य :
करडईची भाजी : १ मोठी जुडी
तूरडाळ : अर्धा वाटी (शिजवलेली)
कांदा :१
लसूण : ६–७ पाकळ्या
कोथिंबीर : थोडी
लाल तिखट : १ टीस्पून
धणे–जिरे पूड – दीड टीस्पून
गोडा मसाला – अर्धा टीस्पून
हळद, मीठ, तेल.
कृती :
करडई स्वच्छ धुवून बारीक चिरा, किंचित उकळून पाणी काढून टाका (कडूपणा कमी होतो).
कढईत तेल, कांदा परतवा.
लसूण–हळद घालून मसाले टाका.
करडई घालून ५ मिनिटं परतवा.
शिजवलेली डाळ + पाणी घालून उकळी आणा.
शेवटी कोथिंबीर घालावी.
गरमागरम ज्वारी किंवा बाजरीच्या भाकरीसोबत खायला द्या.