मुंबई : येत्या रविवारी ३० नोव्हेंबर रोजी विविध अभियांत्रिकी आणि देखभालीची कामे करण्यासाठी मध्य रेल्वेकडून उपनगरीय विभागांवर मेगा ब्लॉक घेणार आहे. हा ब्लॉक मुख्य, हार्बर व ट्रान्स हार्बर मार्गावर बसणार आहे. मुख्य मार्गावर हा ब्लॉक छत्रपती शिवाजी महाराज टर्मिनस आणि विद्याविहार दरम्यान सकाळी १०.५५ ते दुपारी ३. ५५ पर्यंत अप आणि डाउन धीम्या मार्गावर असेल. या कालावधीत छत्रपती शिवाजी महाराज टर्मिनस येथून सकाळी १०.४८ ते दुपारी ३.४५ पर्यंत सुटणाऱ्या डाउन धीम्या मार्गावरील सेवा छत्रपती शिवाजी महाराज टर्मिनस आणि विद्याविहार स्थानकांदरम्यान डाउन जलद मार्गावर वळवल्या जातील. या सेवा भायखळा, परळ, दादर, माटुंगा, शीव आणि कुर्ला स्थानकांवर थांबतील आणि पुढे विद्याविहार स्थानकावर डाउन धीम्या मार्गावर वळवल्या जातील. घाटकोपर येथून सकाळी १०.१९ ते दुपारी ३.५२ पर्यंत सुटणाऱ्या अप धीम्या मार्गावरील गाड्या विद्याविहार आणि छत्रपती शिवाजी महाराज टर्मिनस स्थानकांदरम्यान अप जलद मार्गावर वळवल्या जातील आणि कुर्ला, शीव, माटुंगा, दादर, परळ आणि भायखळा स्थानकांवर थांबतील.
हार्बर मार्गावर हा ब्लॉक पनवेल आणि वाशी स्थानकांदरम्यान (पोर्ट मार्ग वगळून) अप आणि डाउन हार्बर मार्गावर सकाळी ११.०५ ते संध्याकाळी ४. ०५ पर्यंत असेल. या कालावधीत पनवेल येथून सकाळी १०.३३ ते दुपारी ३.४९ पर्यंत सुटणाऱ्या अप हार्बर मार्गावरील छत्रपती शिवाजी महाराज टर्मिनसकडे जाणाऱ्या सेवा आणि छत्रपती शिवाजी महाराज टर्मिनस येथून सकाळी ९.४५ ते सुपारी ३.१२ पर्यंत बेलापूर/पनवेलकडे जाणाऱ्या डाउन हार्बर मार्गावरील सेवा रद्द राहतील.
ट्रान्स-हार्बर मार्गावर ही हा ब्लॉक असेल या दरम्यान पनवेल येथून सकाळी ११.०२ ते दुपारी ३.५३ पर्यंत सुटणाऱ्या व ठाण्याकडे जाणाऱ्या अप ट्रान्स-हार्बर मार्गावरील सेवा आणि ठाणे येथून सकाळी १०.०१ ते दुपारी ३.२० पर्यंत सुटणाऱ्या व पनवेलकडे जाणाऱ्या डाउन ट्रान्स-हार्बर मार्गावरील सेवा रद्द राहतील. ब्लॉक कालावधीत छत्रपती शिवाजी महाराज टर्मिनस मुंबई-वाशी विभागात विशेष लोकल चालवल्या जातील. ब्लॉक काळात ठाणे-वाशी/नेरूळ स्थानकांदरम्यान ट्रान्स-हार्बर मार्गावरील सेवा उपलब्ध असतील. तसेच ब्लॉककाळात पोर्ट मार्ग उपलब्ध असतील.
पश्चिम रेल्वेवर उद्या दिवसा कोणताही ब्लॉक नाही
ट्रॅक, सिग्नलिंग सिस्टीम आणि प्राधान्य उपकरणांच्या देखभालीसाठी, पश्चिम रेल्वे शनिवारी मध्यरात्री १२.१५ ते पहाटे ४.१५ पर्यंत मुंबई मध्य आणि माहीम स्थानकांदरम्यान अप आणि डाऊन जलद मार्गावर चार तासांचा जंबो ब्लॉक घेणार आहे.या कालावधीत जलद मार्गावरील सेवा गाड्या ब्लॉकच्या वेळेनुसार चालतील, सांताक्रूझ आणि चर्चगेट स्थानकांदरम्यान आणि चर्चगेट स्थानकांदरम्यान या सेवा धीम्या मार्गावर सेवा चालेल.
