रोहा : रोहा परिसरातील जीवनरेखा मानली जाणाऱ्या कुंडलिका नदीत धाटाव एमआयडीसी परिसरातून सोडल्या जाणाऱ्या रासायनिक आणि दूषित पाण्यामुळे नदीचे नैसर्गिक स्वरूप नष्ट होऊ लागले आहे. त्यामुळे ही नदी प्रदूषित झाल्याने शेतकऱ्यांसह मच्छिमारांच्या उपजीविकेवर मोठा परिणाम होत आहे.
एमआयडीसी परिसरातील अनेक रासायनिक कारखान्यांकडून उपचार न केलेले दूषित पाणी थेट नदी पात्रात सोडले जाते. या रसायनांमुळे नदीचे पाणी काळवंडण्याबरोबरच नदीच्या पाण्याला दुर्गंधी सुटली आहे. त्यातच भरती-ओहोटीच्या काळात हेच पाणी भातशेतीत येऊन परिणामी पिके सुकतात व शेतीचे उत्पादन घटते. नदीचे पाणी प्रदूषित झाल्याने नदीतील माशांचे प्रमाणही गेल्या काही वर्षांत झपाट्याने कमी झाले आहे. “पूर्वी आमच्या जाळ्यात दिवसाला बरेचसे मासे यायचे, आता मात्र नदीत जीवच उरलेला नाही. उरलेले मासेही विषारी झाल्याची माहिती स्थानिक मच्छिमारांनी `दैनिक प्रहार’शी बोलताना दिली.
दुसरीकडे हवेत सोडल्या जाणाऱ्या रसायनी गॅसमुळे परिसरात श्वसनाचे, दम्याचे, डोळ्यांच्या जळजळीचे आजार वाढले आहेत. मुलांपासून ते वयोवृद्धांपर्यंत सर्वांना या प्रदूषणाचा फटका बसत आहे. धाटाव एमआयडीसीकडून रोजगार, ठेके किंवा इतर कोणत्याही स्वरूपात स्थानिकांना प्राधान्य दिले जात नाही, मात्र त्याच एमआयडीसीच्या दूषित पाण्याचा फटका मात्र या भागातील लोकांना सहन करावा लागतो आहे. दरम्यान कोळी समाजाचे काही नेत्यांसह लोकप्रतिनिधीही या गंभीर प्रश्नावर मौन बाळगत असल्याची चर्चा रोह्यात आहे. प्रदूषण नियंत्रण मंडळाने नियमित तपासणी करून दोषी कारखान्यांवर कडक कारवाई करावी, तसेच नदी शुद्धीकरणासाठी ठोस पावले उचलावीत अशी मागणी जोर धरू लागली आहे.