मुंबई : कफ परेड- वांद्रे-सीप्झ-आरे भुयारी मेट्रो-३ मार्गिकेवरुन प्रवास करणाऱ्यांना आता सवलतीच्या मासिक पासची सुविधा उपलब्ध करून देण्यात आली आहे. या प्रवाशांच्या सोयीसाठी मुंबई मेट्रो रेल कॉर्पोरेशन (एमएमआरसी)द्वारे आजपासून म्हणजेच शुक्रवारपासून मेट्रो-३ च्या मेट्रोकनेक्ट३ मोबाईल ॲपवर सवलतीचे मासिक पास उपलब्ध करण्यात आले आहेत. मोबाईल ॲपद्वारे पास सुविधा देणारी मेट्रो-३ ही देशातील पहिली मेट्रो ठरली आहे. यामुळे सर्वसामान्यांना दिलासा मिळणार आहे.
आजपासून मेट्रो मार्ग ३ वर प्रवास करणारे प्रवाशी दोन प्रकारे सवलतींसह ट्रिप-आधारित पास खरेदी करू शकतात. यामध्ये पहिली ६०-ट्रिप पासवर १५ टक्के सवलत आणि दुसरी ४५-ट्रिप पासवर १० टक्के सवलत अशा सवलतींसह प्रवास करता येणार आहे. हे पास प्रवास अधिक किफायतशीर करण्यासाठी तसेच तिकीट खरेदीची प्रक्रिया अधिक सोपी, डिजिटल आणि संपर्कविरहित करण्याच्या उद्देशाने तयार करण्यात आले आहेत. मेट्रो कनेक्ट ३ ॲपवर सोप्या पद्धतीने प्रवाशी पास खरेदी करून थेट मोबाइलद्वारे पास वापरू शकतात. मेट्रो कनेक्ट ३ ॲप अँड्रॉइड आणि आयओएस या दोन्ही प्लॅटफॉर्मवर उपलब्ध आहे, अशी माहिती देण्यात आली.