कल्याण : कल्याण परिसरात एक धक्कादायक घटना उघडकीस आली आहे. शीळ रोडलगतच्या देसाई खाडीत एका सुटकेसमधून तरुणीचा मृतदेह सापडल्याने खळबळ उडाली आहे. राज्यात वाढत्या खून प्रकरणांच्या पार्श्वभूमीवर या घटनेमुळे कायदा-सुव्यवस्थेवर पुन्हा प्रश्नचिन्ह निर्माण झाले आहे.
प्राथमिक माहितीनुसार मृत तरुणीचे वय अंदाजे 28 ते 30 वर्षे दरम्यान असल्याचे सांगितले जाते. तिची हत्या करून मृतदेह सुटकेसमध्ये ठेवून खाडीत टाकण्यात आला असावा, असा पोलिसांचा अंदाज आहे.
घटनेची माहिती मिळताच पोलिसांनी तातडीने घटनास्थळी धाव घेतली. पंचनामा करून फॉरेन्सिक टीमकडून महत्त्वाचे पुरावे गोळा करण्यात आले आहेत. डाकघर पोलिसांनी मृतदेह ताब्यात घेऊन तो शवविच्छेदनासाठी पाठवला असून, या अहवालानंतर मृत्यूचे नेमके कारण स्पष्ट होणार आहे. अद्याप मृत तरुणीची ओळख पटलेली नसून, हेच पोलिसांसाठी सर्वात मोठे आव्हान बनले आहे.
तरुणीची ओळख नसल्याने आरोपीचा शोध घेणे अवघड झाले आहे. यासाठी पोलीस परिसरातील सीसीटीव्ही फुटेज, तांत्रिक पुरावे व इतर शक्यता तपासत आहेत. पुढील काही तासांत किंवा दिवसांत या प्रकरणात महत्त्वाचे धागेदोरे मिळण्याची शक्यता व्यक्त केली जाते.
