ठाणे: पश्चिम बंगालमधून चरसची विक्री करण्यासाठी आलेल्या तस्कराला ठाणे गुन्हे शाखेने बेड्या ठोकल्या आहेत. शनवर अली (३८) असे या तस्कराचे नाव असून त्याच्याकडून पोलिसांनी ५ कोटी ५० लाखांचे चरस जप्त केले आहे. त्याने हे चरस एका नेपाळी व्यक्तीकडून आणल्याचे तपासात निष्पन्न झाले आहे. पोलीस उपायुक्त अमरसिहं जाधब, सहाय्यक पोलीस आयुक्त शेखर बागडे,यांच्या मार्गदर्शनाखाली तपास करत असताना साकेत रोड ते बाळकुम पाडा २ दरम्यान एक तरुण अमली पदार्थ विक्रीसाठी येणार असल्याची माहिती वागळे गुन्हे शाखेचे वरिष्ठ पोलीस निरीक्षक सलील भोसले यांना मिळाली. त्यानुसार सहाय्यक पोलीस निरीक्षक भूषण शिंदे व जगदीश गावित यांच्या पथकाने सापळा रचत शनवर अन्वर अली वय ३८ वर्ष याच्या मुसक्या आवळल्या. त्याची झडती घेतली असता पोलिसांना त्याच्याकडून ५०५ ग्रॅम वजनाचे दहा पाकीट चरस मिळाले. तो एवढ्या मोठ्या प्रमाणात चरस कोणाला विक्री करण्यासाठी आला होता? हे मोठे रॅकेट असल्याचा अंदाज वर्तवत पोलिसांनी पुढील तपास सुरू केला आहे.