रोहित शर्मा टी-२० विश्वचषकाचा ब्रँड अ‍ॅम्बेसेडर

दुबई : भारताच्या माजी कर्णधार आणि दोन वेळा टी-२० विश्वचषक विजेता रोहित शर्मा याची आगामी टी-२० विश्वचषक २०२६ साठी ब्रँड अॅम्बेसेडर म्हणून नियुक्ती करण्यात आली आहे. भारत आणि श्रीलंका येथे ७ फेब्रुवारीपासून ८ मार्चपर्यंत होणाऱ्या या स्पर्धेत रोहित या नव्या भूमिकेतून सहभागी होणार आहेत. रोहितने २०२४-मध्ये भारतीय संघाचे नेतृत्व करत त्यांना टी-२० विश्वचषक जिंकवला होता. याआधी २००७ मध्येही तो विजयी संघाचा भाग होता. त्यामुळे दोन वेळा विश्वविजेता संघाचा अनुभव असलेल्या मोजक्या खेळाडूंपैकी तो एक आहे.

टी-२० आंतरराष्ट्रीय सामन्यांत रोहितने तब्बल ४२३१ धावा केल्या आणि त्याची स्ट्राईक रेट १४०.८९ आहे. त्याच्या आक्रमक सुरुवातीमुळे भारतीय संघाला अनेक विजय मिळाले आहेत. २००७ च्या स्पर्धेत दक्षिण आफ्रिका व पाकिस्तानविरुद्ध त्याच्या नाबाद भूमिका चर्चेत आल्या. त्यानंतर २०२४मध्ये ऑस्ट्रेलियाविरुद्ध ४१ चेंडूंत ९२ धावा आणि इंग्लंडविरुद्ध ३९ चेंडूंत ५७ धावा करून तो चमकला. विश्वविजयानंतर रोहितने टी-२० क्रिकेटपासून निवृत्ती घेतली होती. परंतु आता “अॅम्बेसेडर” म्हणून जागा घेत असून तो या स्पर्धेशी नव्या भूमिकेत उभा राहणार आहे.

या नियुक्तीबाबत बोलताना रोहित म्हणाला की, “हा विश्वचषक पुन्हा भारतात होतोय याचा आनंद मोठा आहे. नव्या भूमिकेत मन लावून सहभागी होणार असून सर्व खेळाडूंना शुभेच्छा देतो. भारताच्या आदरातिथ्याचा अनुभव खेळाडूंना मिळो आणि त्यांच्याकडे संस्मरणीय अभिज्ञता घेऊन जातील अशी आशा आहे.”