पोलादपूर : मुंबई-गोवा राष्ट्रीय महामाग क्रमांक ६६ वर रायगड जिल्ह्यातील पोलादपूर पोलीस ठाण्याच्या हद्दीतील भोगाव बुद्रुकनजीक सोमवार पहाटे साडेचार वाजण्याच्या सुमारास भीषण अपघात झाला. स्वारगेट पुणे ते दापोलीपर्यंत जाणारी खासगी मिनी बस महामार्गावरील पुलाच्या अलीकडे रिफ्लेक्टर नसलेल्या लोखंडी संरक्षक कठडयांना धडक देत लोखंडी कठडयांसह अंदाजे ४५ ते ५० फूट खोल दरीत कोसळली. या अपघातात २२ प्रवाशी जखमी झाले असून त्यातील १० प्रवाशांची प्रकृती चिंताजनक आहे.
गेल्या काही दिवसांपासून पोलादपूर ते खेड दरम्यानच्या भुयारी मार्गाकडे जाणाऱ्या महामार्गाचे काम सुरू असल्याने मुंबई-गोवा राष्ट्रीय महामार्गावरील एक लेन बंद ठेवण्यात आली आहे. पहाटे धुके असल्याने रिफ्लेक्टर नसलेले लोखंडी संरक्षक कठडे चालक सूरज अलकुंटे याच्या नजरेस न पडल्याने या लोखंडी संरक्षक कठडयांना मिनी बसची धडक बसताच लोखंडी कठडेदेखील काँक्रीटने जमिनीत ठासले नसल्याने लोखंडी कठड्यांसह मिनीबस थेट दरीत कोसळली. यावेळी बसमधील प्रवाशांच्या आवाजाने स्थानिक नागरिकांनी तत्काळ अपघातस्थळी धाव घेत बचावकार्य सुरू केले. त्यानंतर पोलादपूर पोलीस व महामार्ग सुरक्षा पथकानेही घटनास्थळी धाव घेत मदतकार्य सुरू केले. जखमींना खेड-कळंबणी येथील रत्नागिरी उपजिल्हा रूग्णालयामध्ये दाखल केले. खेड तालुक्यातील कळंबणी उपजिल्हा रुग्णालयात शामल आंजर्लेकर, काजल शिगवण, दिलीप मोहिते, अमरनाथ कांबळे, दीपाली काचरे, प्रतीक गुरव, प्रिया गुरव, आनंदी नाचरे, सर्वेश गुहागरकर, मुजिब दलाल, मयुरी शिगवण याशिवाय चालक, वाहक तसेच इतर ९ प्रवाशांना चिपळूण येथील खासगी रुग्णालयात तसेच डेरवण रुग्णालयात उपचारासाठी पाठविण्यात आले आहे.