मुंबई : जगभरातील इंटरनेट वापरकर्त्यांना आज सकाळपासून अचानक अनेक डिजिटल सेवांमध्ये अडथळ्यांचा सामना करावा लागला. X (पूर्वी ट्विटर), Canva, ChatGPT, OpenAI, AWS यांसह असंख्य लोकप्रिय प्लॅटफॉर्म काही काळासाठी ठप्प झाले. या मोठ्या व्यत्ययामागील कारण क्लाउडफ्लेअरचा तांत्रिक बिघाड असल्याचे सांगितले जात आहे. इंटरनेट ट्रॅफिकचे व्यवस्थापन आणि सुरक्षा हाताळणाऱ्या या महत्त्वाच्या नेटवर्क इन्फ्रास्ट्रक्चरमध्ये समस्या उद्भवल्याने हजारो वेबसाइट्सचा वेग मंदावला आणि अनेक सेवा पूर्णपणे बंद झाल्या.
वापरकर्त्यांनी टाइमलाइन न उघडणे, पोस्ट्स लोड न होणे, लॉग-इन अपयशी ठरणे, तसेच फोटो-फाइल अपलोड न होण्यासारख्या तक्रारी मोठ्या प्रमाणात नोंदवल्या. क्लाउडफ्लेअरच्या जागतिक डेटा सेंटर्समध्ये सुरू असलेल्या देखभाल प्रक्रियेदरम्यान अनपेक्षित अडथळा निर्माण झाल्यामुळे उत्तर अमेरिका, युरोप, आशिया आणि लॅटिन अमेरिकेत व्यापक परिणाम जाणवला. अनेक सेवांना 500 एरर येत होता, तर काही साइट्स पूर्णपणे बंद पडल्या.
या आउटेजचा सर्वाधिक फटका X आणि Canva वापरकर्त्यांना बसला. X वर टाइमलाइन रिफ्रेश न होणे, DM न उघडणे अशा समस्या वाढल्या. तर भारत, अमेरिका, इंग्लंड आणि ऑस्ट्रेलियासह अनेक देशांत Canva सेवा पूर्णपणे निष्क्रिय झाली. फोटो एडिटिंग, प्रोजेक्ट डिझाइन आणि फाइल सेव्हिंगमध्ये प्रचंड अडचणींमुळे वापरकर्त्यांनी इतर पर्यायांचा आधार घेतला. डाउनडिटेक्टरवर काही मिनिटांतच शेकडो तक्रारी नोंदवल्या गेल्या.
क्लाउडफ्लेअर हे जगातील सर्वात मोठ्या इंटरनेट इन्फ्रास्ट्रक्चर नेटवर्कपैकी एक असून वेबसाइट्स जलद, सुरक्षित आणि स्थिर ठेवण्यासाठी ते CDN, सुरक्षा संरक्षण आणि डेटा सेंटर सेवा पुरवते. वेबसाइट्सवर अचानक वाढलेला ट्रॅफिक, सर्व्हरवरील हल्ले किंवा जास्त लोड सांभाळण्यासाठी क्लाउडफ्लेअरचे सर्व्हर कंटेंट अनेक ठिकाणी पसरवतात, ज्यामुळे वापरकर्त्यांना जवळच्या सर्व्हरमधून पेज पटकन उघडता येतात. त्यामुळे या कंपनीत झालेला कोणताही बिघाड एका प्लॅटफॉर्मपुरता मर्यादित राहत नाही, तर हजारो वेबसाइट्सला त्याचा फटका एकाचवेळी बसतो.
भारतामध्ये ChatGPT च्याही सेवा बंद झाल्या. काही ठिकाणी प्लॅटफॉर्म उघडत नव्हता, तर काही ठिकाणी प्रतिसाद मिळण्यात मोठा विलंब होत होता. डिजिटल साधनांवर अवलंबून असलेले अनेक कामकाज काही तासांसाठी ठप्प राहिले. क्लाउडफ्लेअरमधील या बिघाडाने जागतिक इंटरनेट यंत्रणा किती गुंतागुंतीची आणि परस्परावलंबी आहे, याची पुन्हा एकदा जाणीव करून दिली.