ढाका(बांग्लादेश): ऑगस्ट २०२४ मध्ये बांगलादेश हादरवून टाकणाऱ्या विद्यार्थी चळवळीदरम्यान झालेल्या अशांततेशी संबंधित मानवतेविरुद्धच्या गुन्ह्यांचा आरोप असलेल्या प्रकरणात आंतरराष्ट्रीय गुन्हे न्यायाधिकरण आज निकाल देणार आहे. या पार्श्वभूमीवर, शेख हसीना यांच्या पक्षाने (अवामी लीगने) देशव्यापी 'बंद'ची हाक दिली आहे. यामुळे निकालापूर्वी बांगलादेश हाय अलर्टवर आहे.
पदच्युत पंतप्रधानांच्या विरोधात बहुप्रतिक्षित निकाल देण्याच्या एक दिवस आधी हसीना यांनी पक्ष कार्यकर्त्यांना एक भावनिक ऑडिओ संदेश जारी केला आहे. ज्यामध्ये बांगलादेशात रस्त्यावरील आंदोलने आणखी तीव्र करण्याचे आवाहन केले आहे. दरम्यान काल (१६ नोव्हेंबर) संध्याकाळी ढाक्यातील अनेक ठिकाणी स्फोटक यंत्रे (आयईडी) स्फोट झाल्याची माहिती मिळाली. अंतरिम सरकारच्या सल्लागार सय्यदा रिझवाना हसन यांच्या निवासस्थानासमोर रात्री ९ वाजण्याच्या सुमारास दोन सुधारित स्फोटक यंत्राचा स्फोट झाला. तर कारवान बाजार परिसरात आणखी एक स्फोट झाला. मात्र अद्याप कोणतीही जीवितहानी झालेली नाही.
१६ नोव्हेंबरच्या सकाळी बांगलादेशमध्ये असामान्य शांतता होती . सामान्यतः वाहतुकीने गजबजलेल्या रस्त्यांवर कमी रहदारी होती. दुकाने उशिरा उघडली गेली. तर अनेक लोकांनी घरातच राहणे पसंत केले. अवामी लीगने दोन दिवसांचा देशव्यापी बंद जाहीर केल्यावर ही चिंता वाढली. अंतरिम सरकारने पक्ष आणि त्याच्या सहयोगी संघटनांच्या सर्व क्रियाकलापांवर बंदी घातल्याने, अवामी लीगचे नेते आता अज्ञात ठिकाणांहून सोशल मीडियाचा वापर करून घोषणा देत आहेत. दरम्यान ढाका मेट्रोपॉलिटन पोलिस आयुक्त शेख मोहम्मद सज्जाद अली यांनी हिंसाचार करणाऱ्यांवर विशेषतः पोलिसांवर हल्ला करणाऱ्यांवर गोळीबार करण्याचे आदेश अधिकाऱ्यांना दिले आहेत.
शेख हसीना यांना होणार फाशीची शिक्षा
शेख हसीना यांचे सरकार कोसळल्यानंतर बांग्लादेशात अंतरिम सरकार स्थापन झाले. मात्र, अद्याप देशातील परिस्थिती पूर्वपदावर आलेली नाही. अशातच, सरकारने पदच्युत पंतप्रधान शेख हसीना यांना मानवतेविरुद्ध गुन्ह्यांच्या आरोपांत फाशीची शिक्षा सुनावण्याची तयारी केली आहे. देशातील ‘आंतरराष्ट्रीय गुन्हे न्यायाधिकरणाने’ १३ नोव्हेंबर रोजी घोषणा केली की, या प्रकरणाचा अंतिम निकाल १७ नोव्हेंबरला जाहीर केला जाणार आहे. या घोषणेनंतर ढाकामध्ये तणावाचे वातावरण आहे. माजी पंतप्रधानांचा पक्ष असलेल्या आवामी लीगने ‘ढाका बंद’चे आवाहन केले आहे.
