मुंबई: विक्रोळी येथील बुध्द विहारातून भगवान गौतम बुध्दांची पुरातन मूर्ती चोरणाऱ्यांना विक्रोळी पोलिसांनी तांत्रिक तपासाच्या सहाय्याने अटक केली आहे. सीसीटीव्हीच्या आधारे पोलिसांनी आरोपीला शोधून काढत वांद्रे परिसरातून अटक केली. विक्रोळीतील कन्नमवार नगर येथील बुध्दविहारात सुमारे १३ किलो वजनाची जपानी बनावटीची पंचधातूची पुरातन बुध्द मूर्ती आहे. ही मुर्ती १३ नोव्हेंबर रोजी चोरी झाल्याने विक्रोळी पोलीस ठाण्यात गुन्हा दाखल करण्यात आला होती.
चोरीच्या तपासासाठी विक्रोळी पोलिसांनी वेगवेगळी पथके तयार करत घटनास्थळ आणि परिसराचे सीसीटीव्ही तपासले. यावेळी एक संशयित इसम पाठीवर पांढऱ्या रंगाची जड पिशवी घेऊन जात असल्याचे पोलिसांच्या निदर्शनास आले. यानंतर पोलिसांनी सीसीटीव्हीद्वारे चोराचा मागोवा घेतला.
दिल्ली: दिल्लीच्या लाल किल्ला परिसरात झालेल्या कार बॉम्बस्फोट प्रकरणात राष्ट्रीय तपास यंत्रणेला मोठे यश मिळाले आहे. आत्मघातकी बॉम्बरसह दहशतवादी कट ...
चोराने चोरी केल्यानंतर विक्रोळी स्थानकातून छत्रपती शिवाजी महाराज टर्मिनस (सीएसएमटी) स्थानकाकडे जाणारी लोकल पकडली. यामुळे पोलिसांनी विक्रोळी ते छत्रपती शिवाजी महाराज टर्मिनस दरम्यानच्या सर्व स्थानकांवरील सीसीटीव्ही तपासले. तपासणी दरम्यान संशयित चोर दादरला उतरून पश्चिम रेल्वेकडे जाताना दिसला. त्यामुळे पोलिसांनी परत पश्चिम रेल्वेच्या स्थानकांवरील सीसीटीव्ही तपासले. यावेळी चोर माहिमला उतरल्याचे समोर आले.
यानंतर पोलिसांनी माहिम परिसरातील सीसीटीव्ही तपासले. दरम्यान संशयित चोर एका भंगारच्या दुकानात मूर्ती घेऊन जात असल्याचे दिसले. यावेळी पोलिसांनी पुढील तपास करत संशयित आरोपी जितेंद्र बिनकर (४६) आणि त्याचा साथीदार मार्टीन कन्नन (४६) या दोघांना सापळा रचून अटक केली. तसेच भगवान गौतम बुध्दांची मूर्ती ताब्यात घेण्यात आली आहे. ही कारवाई विक्रोळी पोलीस ठाण्याचे वरिष्ठ पोलीस निरीक्षक सुर्यकांत नाईकवाडी, पोलीस निरीक्षक (गुन्हे) संदेश मोरे, पोलीस निरीक्षक सुनिल क्षीरसागर, पोलीस उपनिरीक्षक पंकज पाटील, पोलीस उपनिरीक्षक योगेश चिंचळे आदींच्या पथकाने केली.