Dharmendra : बॉलिवूडचे 'ही-मॅन' धर्मेंद्र रुग्णालयात दाखल; मुंबईतील ब्रीच कँडी रुग्णालयात उपचार सुरू; प्रकृतीबद्दल मोठी अपडेट

मुंबई : बॉलिवूडचे दिग्गज आणि ज्येष्ठ अभिनेते धर्मेंद्र (Dharmendra) यांची प्रकृती अचानक बिघडल्याची माहिती समोर आली आहे. त्यांना तातडीने उपचारांसाठी मुंबईतील ब्रीच कँडी रुग्णालयात दाखल करण्यात आले आहे.  धर्मेंद्र यांच्यावर सध्या रुग्णालयात उपचार सुरू आहेत. मिळालेल्या माहितीनुसार, धर्मेंद्र यांना कोणतीही गंभीर आरोग्याची समस्या नाही. त्यांच्या वाढत्या वयाचा विचार करून, त्यांना केवळ नियमित तपासणी (Regular Checkup) आणि खबरदारीचा उपाय म्हणून रुग्णालयात आणले गेले आहे. 'ही-मॅन' म्हणून ओळख असलेल्या या अभिनेत्याला रुग्णालयात दाखल केल्याचे वृत्त कळताच, त्यांच्या देशभरातील चाहत्यांमध्ये चिंतेचे वातावरण निर्माण झाले आहे. चाहते सोशल मीडियावर आणि इतर माध्यमातून ते लवकर बरे व्हावे यासाठी प्रार्थना करत आहेत. वयोमानानुसार धर्मेंद्र यांना आरोग्याच्या समस्या जाणवत असतात. यापूर्वीही २०१९ मध्ये आणि २०२३ मध्येही त्यांची प्रकृती बिघडली होती, तेव्हा त्यांना उपचारासाठी दाखल करण्यात आले होते.

'रूटीन चेकअप'साठी रुग्णालयात दाखल 

धर्मेंद्र यांच्या कुटुंबाशी संबंधित विश्वसनीय सूत्रांनी या सर्व चर्चांना पूर्णविराम दिला आहे. त्यांनी स्पष्ट केले आहे की, धर्मेंद्र यांना कोणत्याही गंभीर आरोग्य समस्येमुळे रुग्णालयात दाखल केलेले नाही. वाढत्या वयाचा (ते लवकरच ९० वर्षांचे होतील) विचार करून, फक्त खबरदारीचा उपाय म्हणून त्यांना रुग्णालयात नेण्यात आले आहे. ही त्यांची नियमित वैद्यकीय तपासणी (रूटीन चेकअप) आहे. आवश्यक चाचण्या आणि तपासणी पूर्ण झाल्यानंतर त्यांना लवकरच डिस्चार्ज मिळण्याची शक्यता आहे.

२०२३ मध्येही झाले होते रूग्णालयात दाखल; पत्नी हेमा मालिनी यांनी दिले होते स्पष्टीकरण

२०२३ मध्येही त्यांची प्रकृती बिघडल्याने त्यांना उपचारांची गरज भासली होती. यावेळी त्यांचा मुलगा आणि अभिनेता सनी देओल यांनी पुढाकार घेत त्यांना उपचारांसाठी अमेरिकेला नेले होते. त्यावेळी, त्यांच्या प्रकृतीमधील बिघाडाचे मुख्य कारण वयोमानानुसार होणारे त्रास असल्याचे समोर आले होते. धर्मेंद्र यांच्या प्रकृतीच्या बातम्यांवर त्यांची पत्नी आणि अभिनेत्री हेमा मालिनी यांनी त्यावेळी स्पष्टीकरण दिले होते. त्यांनी सांगितले होते की, धर्मेंद्र हे केवळ नियमित तपासणीसाठी (Regular Checkup) रुग्णालयात गेले होते आणि काळजी करण्यासारखे काहीही नव्हते. या पूर्वीच्या अनुभवावरून हे स्पष्ट होते की, वयाच्या या टप्प्यावर धर्मेंद्रजींना वारंवार वैद्यकीय देखरेखीची आवश्यकता भासते. याच पार्श्वभूमीवर, आता पुन्हा एकदा त्यांना रूटीन चेकअप आणि आवश्यक खबरदारीचा उपाय म्हणून रुग्णालयात दाखल करण्यात आले आहे.