Carbide Gun Causes : खेळणं की 'घातक शस्त्र'? दिवाळीचा आनंद अंधारात! १५० रुपयांच्या कार्बाइड गनने १४ चिमुकल्यांची दृष्टी हिरावली

जबलपूर : यावर्षी अनेक घरांसाठी दिवाळीचा सण आनंद नव्हे, तर दुःख आणि मोठी चिंता घेऊन आला आहे. याचे कारण म्हणजे कार्बाइड गन (Carbide Gun) वा डेजी फायर क्रॅकर गन (Desi Fire Cracker Gun) नावाच्या एका स्थानिक उत्पादनाने मोठा घात केला आहे. गेल्या अवघ्या तीन दिवसांत या घातक खेळण्यामुळे १३० हून अधिक मुलांना रुग्णालयात दाखल करण्याची वेळ आली आहे. यातील सर्वात धक्कादायक बाब म्हणजे, या 'जुगाड गन'मुळे १४ चिमुकल्यांची दृष्टी हिरावली गेली आहे. भोपाळ, इंदुर, ग्वाल्हेर, जबलपूर आणि विदिशा यांसारख्या जिल्ह्यांमध्ये या धोकादायक जुगाड गनची सर्रास विक्री झाली, ज्यामुळे अनेक घरांवर दुःखाचे सावट पसरले आहे. डॉक्टरांच्या माहितीनुसार, या दुर्घटनेत जखमी झालेल्या मुलांमध्ये ६ ते १५ वर्षे वयोगटातील मुलांचा समावेश आहे. या घटनेमुळे अशा घातक खेळण्यांच्या विक्री आणि वापरावर तातडीने कठोर नियम करण्याची गरज व्यक्त होत आहे.

'कार्बाइड गन'ने हिरावला दिवाळीचा आनंद; भोपाळमध्ये ७० हून अधिक मुले रुग्णालयात

मध्य प्रदेशात या दिवाळीत 'कार्बाइड गन' (Carbide Gun) नावाच्या घातक खेळण्यामुळे अनेक घरांमध्ये दुःखाचे वातावरण पसरले आहे. या गनने अनेक कुटुंबांचे हास्य हिरावले असून, उत्सव काळात मोठी दुर्घटना घडली आहे. भोपाळ, इंदुर, ग्वाल्हेर, जबलपूरसह अनेक मोठी शहरे आणि विदिशा या जिल्ह्यांमध्ये या घटनेमुळे अनेक घरांवर दुःखाचे सावट पसरले आहे. मिळालेल्या माहितीनुसार, एकट्या भोपाळमध्येच या घातक गनमुळे ७० हून अधिक मुलांना रुग्णालयात दाखल करण्यात आले आहे. या जखमी मुलांवर भोपाळमधील हमीदिया, जेपी, सेवा सदन आणि एम्स (Hamidia, JP, Sewa Sadan and AIIMS) यांसारख्या मोठ्या रुग्णालयांमध्ये उपचार सुरू आहेत. यातील अनेक मुलांच्या डोळ्यांना गंभीर दुखापत (Severe Eye Injuries) झाली आहे. इतके घातक खेळणे बाजारात सर्रास विकले जात असताना महापालिका प्रशासन, अग्निशमन दल आणि इतर प्रशासकीय अधिकारी झोपेत होते का? असा संतप्त सवाल नागरिक आणि पालकांकडून विचारला जात आहे. या दुर्घटनेसाठी प्रशासनाच्या दुर्लक्षाला जबाबदार धरले जात आहे.

कशी तयार होते ही 'जुगाड गन'?

मध्य प्रदेशात अनेक चिमुकल्यांच्या दृष्टीला धोका निर्माण करणारी 'कार्बाइड गन' नेमकी कशी तयार होते आणि ती किती घातक आहे, यावर आता चर्चा सुरू झाली आहे. याला अनेकदा 'देसी जुगाड' म्हणून ओळखले जाते. या धोकादायक गनमध्ये प्रामुख्याने कॅल्शियम कार्बाइड, एक प्लास्टिक पाईप आणि एक साधा गॅस लायटर वापरला जातो. जेव्हा कॅल्शियम कार्बाइड पाण्याच्या संपर्कात येते, तेव्हा त्यातून ॲसिटिलीन गॅस (Acetylene Gas) तयार होतो. हा गॅस पाईपमध्ये जमा झाल्यानंतर, ठिणगी पडताच मोठा धमाका होतो. या धमाक्यामुळे प्लास्टिक पाईपचे तुकडे आणि छर्रे मोठ्या वेगाने बाहेर पडतात. हे छर्रे डोळ्यात, चेहऱ्यावर आणि शरीरावर आदळून गंभीर इजा करतात. केवळ ₹१५० इतक्या कमी किमतीत बाजारात उपलब्ध असलेल्या याच गनने १४ मुलांचे भावी आयुष्य अंधकारमय केले आहे. डॉक्टरांच्या मते, हे कुठलेही साधे खेळणे नसून, ते एक घातक शस्त्र आहे. इतके गंभीर शस्त्र खुलेआम बाजारात विकले जात असल्याने प्रशासनाविरुद्ध तीव्र संतापाची लाट उसळली आहे.

मुख्यमंत्री मोहन यादवांच्या आदेशानंतरही विक्री सुरू

'कार्बाइड गन' (Carbide Gun) दुर्घटनेत जखमी झालेल्या मुलांच्या पालकांचे दुःख अनेकांचे मन हेलावून टाकणारे आहे. हमीदिया रुग्णालयात (Hamidia Hospital) १४ वर्षीय हेमंत पंथी आणि १५ वर्षीय आरिस या मुलांवर उपचार सुरू आहेत. आरिसचे वडील सरीख खान यांनी सांगितले की, मुलांच्या हट्टामुळे त्यांनी ही गन घेतली. परंतु, हे खेळणे इतके घातक असेल याची त्यांना कल्पना नव्हती. या दुर्घटनेसाठी दोषी असलेल्यांवर कठोर कारवाई करण्याची मागणी त्यांनी केली आहे. या दुर्घटनेत जखमी झालेल्या राज विश्वकर्मा नावाच्या मुलाने सांगितले की, त्याने सोशल मीडियावर (Social Media) पाहून ही गन तयार केली आणि स्फोटानंतर त्याची दृष्टी गेली. दरम्यान, राज्याचे मुख्यमंत्री मोहन यादव यांनी १८ ऑक्टोबर रोजीच प्रशासनाला कार्बाइड गनची विक्री तात्काळ थांबवण्याचे आदेश दिले होते. मुख्यमंत्र्यांच्या आदेशानंतरही हा जीवघेणा प्रकार घडल्यामुळे, प्रशासनाच्या कारभारावर आणि निष्काळजीपणावर आता मोठे प्रश्नचिन्ह उभे राहिले आहे.