Mumbai Fire News : जोगेश्वरीतील 'जे. एन. एस. बिझनेस सेंटर'ला भीषण आग; अग्निशमन दलाकडून 'लेव्हल-२' घोषित, पण मोठी दुर्घटना टळली

मुंबई : मुंबईतील जोगेश्वरी पश्चिम (Jogeshwari West) परिसरात आज, गुरुवारी सकाळी 'जे. एन. एस. बिझनेस सेंटर' या उंच इमारतीला भीषण आग लागल्याची घटना घडली. सकाळी १० वाजून ५१ मिनिटांनी बृहन्मुंबई महानगरपालिकेच्या (BMC) मुंबई अग्निशमन दलाला (MFB) या दुर्घटनेची माहिती देण्यात आली. एस. व्ही. रोडवरील बेहरामपाडा येथील गांधी शाळेजवळ असलेल्या या उंच इमारतीला आग लागल्याचे समजताच परिसरात एकच भीतीचे वातावरण पसरले. घटनास्थळी तातडीने दाखल झालेल्या मुंबई अग्निशमन दलाच्या जवानांनी परिस्थितीचे गांभीर्य लक्षात घेऊन या आगीला 'लेव्हल-२' चा कॉल म्हणून घोषित केले.



या घटनेची माहिती मिळताच एमएफबीची अनेक वाहने, स्थानिक पोलीस दल, १०८ रुग्णवाहिका, पीडब्ल्यूडी पथक, बीएमसीचे प्रभाग कर्मचारी आणि वीज वितरण कंपनीचे कर्मचारी तातडीने घटनास्थळी पोहोचले. या सर्व एजन्सीजच्या मदतीने मदत आणि बचावकार्य वेगाने सुरू करण्यात आले आहे. सध्याच्या माहितीनुसार, या आगीत कोणतीही जीवितहानी किंवा कोणीही जखमी झाल्याचे वृत्त नाही. अग्निशमन दलाच्या जवानांनी इमारतीत अडकलेल्यांची सुरक्षितपणे सुटका केली आहे. मात्र, आग लागण्याचे नेमके कारण अद्याप समजू शकलेले नाही. बीएमसी आणि अग्निशमन दलाचे वरिष्ठ अधिकारी सध्या घटनास्थळी उपस्थित राहून परिस्थितीवर लक्ष ठेवून आहेत. आगीचे कारण आणि या दुर्घटनेमुळे झालेल्या नुकसानीचा पुढील तपास सुरू आहे.