नवी दिल्ली : उत्तर प्रदेशातील महोबा जिल्ह्यात त्रिस्तरीय पंचायत निवडणुकीच्या मतदार यादीत मोठी अनियमितता समोर आली आहे. पडताळणीदरम्यान एका ग्रामपंचायतीमध्ये एकाच घराच्या नंबरवर ६३२ मतदार नोंदणीकृत आढळले आहेत. तर, दुसऱ्या ग्रामपंचायतीत एका घराच्या नंबरवर ४,००० पेक्षा जास्त मतदार आढळले आहेत.

हे प्रकरण उघडकीस आल्यानंतर, अधिकारी याला लिपिकाकडून झालेली चूक सांगून चूक दुरुस्त करण्याची ग्वाही देत आहेत. जिल्ह्यामध्ये आर्टिफिशियल इंटेलिजन्सद्वारे करण्यात आलेल्या तपासणीत १,०६,५४२ बनावट मतदार आढळले आहेत.

बीएलओ घरोघरी जाऊन बनावट मतदारांची तपासणी करत असताना तपासणीदरम्यान महोबा जिल्ह्यात एआयने केलेल्या तपासात १,०६,५४२ बनावट मतदार आढळले आहेत. वृंदावन यांच्या ८०३ क्रमांकाच्या घरामध्ये मतदार यादी क्रमांक २२८३ ते ६९६९ पर्यंत तब्बल ४,२७१ मतदार नोंदवले गेले आहेत. ही यादी पाहून पडताळणीचे काम करणाऱ्या बीएलओ रश्मी यांचे डोके चक्रावून गेले. त्यांनी तात्काळ एसडीएम कुलपहाड यांना या प्रकरणाची माहिती दिली.

निवडणूक आयोगावर प्रश्नचिन्ह

आम आदमी पार्टीचे (आप) राज्यसभा खासदार संजय सिंह यांनी उत्तर प्रदेशातील मतदार याद्यांमध्ये मोठ्या प्रमाणात गैरव्यवहार झाल्याचा गंभीर आरोप केला आहे. महोबा जिल्ह्यात एकाच घरात तब्बल ४,२७१ मतदार नोंदणीकृत असल्याचे त्यांनी पत्रकार परिषदेत सांगितले, ज्यामुळे मोठी खळबळ उडाली आहे.

यापूर्वी संजय सिंह यांनी महोबातील दोन घरांमध्ये २४३ आणि १८५ मतदार सापडल्याचा दावा केला होता. आता एकाच घरात ४,२७१ मतदार सापडल्यामुळे हा प्रकार धक्कादायक असल्याचे त्यांनी म्हटले आहे. "एका घरात ४,२७१ मतदार असल्यास, त्या कुटुंबात सुमारे १२,००० सदस्य असावेत. इतके मोठे कुटुंब शोधून काढणे गरजेचे आहे," असे उपरोधिकपणे सिंह म्हणाले.

संजय सिंह यांनी भाजप आणि निवडणूक आयोगाच्या संगनमताने उत्तर प्रदेशात 'मतदारचोरी' सुरू झाल्याचा आरोप केला आहे. त्यांनी महोबातील त्या घराच्या मालकाला उपरोधिकपणे सांगितले की, "जर तुम्ही ग्रामपंचायतीची निवडणूक लढवली, तर तुम्ही सहज जिंकू शकता, कारण तुमच्या कुटुंबातील सदस्यांच्या मतांनीच तुमचा विजय निश्चित होईल."