मुंबई : मुंबईतील कुलाबा येथील नौदलाच्या प्रवेशबंदी असलेल्या ठिकाणी शनिवारी संध्याकाळी एक मोठी घटना घडली. नौदलाच्या गणवेशात असलेली एक अज्ञात व्यक्ती नेव्ही नगरमधील निवासी भागात घुसला. आणि स्वत:ला पुढच्या शिफ्टसाठी आलेला गार्ड असल्याचे भासवून एका कनिष्ठ नौदल कर्मचाऱ्याकडून इन्सास रायफल व दोन मॅगझिनसह ४० जिवंत काडतुसे घेऊन फरार झाला .
हा व्यक्ती संध्याकाळी सुमारे ७.३० वाजता ड्युटीवरील गार्डला भेटला आणि "तुला बदलण्यासाठी मला पाठवले आहे" असे सांगितले. गार्डने विश्वास ठेवून आपले शस्त्र त्याच्याकडे सुपूर्द केले. काही वेळाने घड्याळ विसरल्याचे लक्षात आल्याने तो गार्ड परत पोस्टवर आला , पण तोपर्यंत तो अज्ञात व्यक्ती तिथून फरार झाला होता .
त्यानंतर तीन तासांच्या शोधानंतरही काहीच सुराग न मिळाल्याने वरिष्ठ अधिकाऱ्यांना माहिती देण्यात आली. नौदल आणि कफ परेड पोलिसांनी यासंदर्भात तातडीने गुन्हा दाखल केला असून एनआयए आणि एटीएससह अनेक सुरक्षा यंत्रणा तपासात सहभागी झाल्या आहेत.
नौदलाकडून परिसरात शोधमोहीम राबवण्यात आली, पण सध्या संशयिताचा काहीच ठावठिकाणा लागलेला नाही. घटनास्थळाजवळील सीसीटीव्ही फुटेज तपासले जात असून, कर्मचाऱ्याने दिलेल्या वर्णनाच्या आधारे एक संशयिताचा स्केच तयार करण्यात आला आहे.
या घटनेमुळे लष्करी भागातील सुरक्षा यंत्रणांवर प्रश्नचिन्ह उपस्थित झाले आहे.