नवी दिल्ली : दिल्लीच्या चाणक्यपुरीत मॉर्निंग वॉक करताना चोरट्याने सोनसाखळी चोरली अशी तक्रार काँग्रेसच्या महिला खासदार सुधा रामकृष्णन यांनी केली. ही तक्रार नोंदवून घेतल्यानंतर दिल्ली पोलिसांनी तपास सुरू केला आहे.
खासदार सुधा रामकृष्णन तामिळनाडू भवनमध्ये राहतात. तामिळनाडूतील मयिलादुथुराई येथील खासदार रामकृष्णन यांनी सांगितले की, चाणक्यपुरी येथील पोलिश दूतावासाजवळ त्या द्रमुकच्या त्यांच्या सहकारी खासदार राजथी यांच्यासोबत फिरत असताना सोनसाखळी चोरीची घटना घडली. या प्रकरणात खासदार सुधा रामकृष्णन यांनी केंद्रीय गृहमंत्री अमित शाह यांना पत्र लिहिले आहे. स्कूटरवरून येणाऱ्या एका व्यक्तीने सोनसाखळी खेचली आणि वेगाने निघून गेला असे खासदार सुधा रामकृष्णन यांनी पोलिसांना तसेच पत्राद्वारे अमित शाह यांना सांगितले आहे. चोरट्याने हेल्मेट घातले असल्यामुळे त्याचा चेहरा दिसला नसल्याची माहिती खासदार सुधा रामकृष्णन यांनी दिली. चोरीची घटना सकाळी ६:१५ च्या सुमारास घडली. चोरटा विरुद्ध दिशेने त्यांच्या जवळ आला आणि सोनसाखळी चोरुन पळून गेला, असे खासदार सुधा रामकृष्णन यांनी सांगितले.
चोरटा आमच्या दिशेने शांतपणे आला त्यामुळे त्याचा उद्देश चोर करणे हाच आहे, हे लक्षात आले नव्हते; असे खासदार सुधा रामकृष्णन म्हणाल्या. चोरट्याने सोनसाखळी जोरात खेचली, यामुळे मानेला दुखापत झाली आणि चुडीदार फाटला असे खासदार सुधा रामकृष्णन यांनी सांगितले.
