जेएनयूमध्ये कुसुमाग्रज अध्यासन केंद्राचे
आज मुख्यमंत्र्यांच्या हस्ते उद्घाटन
मुंबई : देशात प्रतिष्ठेच्या मानल्या जाणाऱ्या दिल्लीतील जवाहरलाल नेहरू विद्यापीठात महाराष्ट्र सरकारच्यावतीने उभारण्यात आलेल्या कुसुमाग्रज मराठी अध्यासन केंद्र आणि छत्रपती शिवाजी महाराज अध्यासन केंद्राचे उद्घाटन गुरुवारी होणार असून या सोहळ्याला मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि अजित पवार हे उपस्थित राहणार असल्याची माहिती मराठी भाषा मंत्री उदय सामंत यांनी बुधवारी येथे दिली.
जवाहरलाल नेहरू विद्यापीठाला आपण दोन महिन्यापूर्वी भेट दिली होती. तेथील कुलगुरुंशी चर्चा केल्यानंतर १६ वर्षापूर्वी महाराष्ट्र सरकारने तेथे मराठी भाषा अध्यासन केंद्रासाठी २ कोटी रूपये दिल्याचे समजले. त्यासाठी त्यांनी आणखी तीन कोटीची मागणी केली असता मराठी भाषा विभागाचा मंत्री म्हणून तो निधी देण्याचा निर्णय त्याच क्षणी घेतला.
पण त्या मराठी अध्यासन केंद्राला कुसुमाग्रज मराठी अध्यासन केंद्र असे नाव द्यावे अशी सूचना केली असता त्यांनी ती मान्य केल्याचे सामंत यांनी सांगितले. तसेच एकनाथ शिंदे हे मुख्यमंत्री असताना त्यांनी जेएनयूमध्ये छत्रपती शिवाजी महाराजांच्या अध्यासन केंद्रासाठी १० कोटी रुपये वर्ग केले होते,असे सामंत यांनी सांगितले.
आता गुरुवारी संध्याकाळी पाच वाजता जवाहरलाल नेहरू विद्यापीठात कुसुमाग्रज मराठी अध्यासन केंद्र आणि छत्रपती शिवाजी महाराजांच्या जीवन चरित्र आणि व्यक्तिमत्वावर अभ्यास करण्यासाठी सुरू होणाऱ्या अध्यासन केंद्राचा उद्घाटन सोहोळा होणार आहे. दिल्लीत मराठी भाषेचे अध्यासन केंद्र सुरु करणे हे मराठी माणसासाठी अभिमानाचे आहे. मराठी भाषेला सातासमुद्रापार घेऊन जाता येत असेल, देशाच्या कानाकोपऱ्यात मराठी पोहोचवायची असेल तर दिल्लीतील जेएनयूसारख्या विद्यापीठात अध्यासन केंद्र होणे गरजेचे होते, असेही सांमत म्हणाले.