वॉशिंग्टन: अमेरिकेचे राष्ट्राध्यक्ष डोनाल्ड ट्रम्प यांनी शुक्रवारी वॉल स्ट्रीट जर्नल आणि रुपर्ट मर्डोकसह त्याच्या मालकांवर खटला दाखल केला आणि १० अब्ज डॉलर्सची नुकसानभरपाई मागितली. ट्रम्प यांनी २००३ मध्ये जेफ्री एपस्टाईन यांना वाढदिवसाच्या शुभेच्छा संदेश पाठवल्याचे वृत्त या वृत्तपत्रामध्ये प्रसारित करण्यात आले आले होते, ज्यामध्ये एका नग्न महिलेचे रेखाचित्र आणि ट्रम्प यांची अश्लील स्वरूपात स्वाक्षरी होती.
मियामीमधील फ्लोरिडाच्या दक्षिणी जिल्ह्यातील फेडरल कोर्टात दाखल केलेला हा खटला वॉल स्ट्रीट जर्नलने २००३ मध्ये ट्रम्प यांनी एपस्टाईन (Epstein Files) यांना वाढदिवसाचे पत्र पाठवल्याचा दावा प्रकाशित केल्यानंतर काही दिवसांनी आला आहे.
वाढदिवसाच्या पत्रात काय होते?
अहवालानुसार, घिसलेन मॅक्सवेल यांनी कथितरित्या संकलित केलेल्या वाढदिवसाच्या अल्बममध्ये एका नग्न महिलेचे रेखाचित्र होते ज्यावर ट्रम्प यांची सही अश्लील स्वरूपात होती. डोनाल्ड ट्रम्प यांनी या बातमीचे जोरदार खंडन केले असून, हे पत्र देखील बनावट असल्याचे म्हटले आहे. त्यांनी एका सोशल मीडिया पोस्टमध्ये लिहिले आहे की, "द वॉल स्ट्रीट जर्नलने एपस्टाईनला लिहिलेले बनावट पत्र प्रकाशित केले आहे. हे माझे शब्द नाहीत, मी असे बोलत नाही आणि मी रेखाचित्र देखील काढत नाही."
दुसऱ्या सोशल मीडिया पोस्टमध्ये ट्रम्प यांनी लिहिले: "मी रूपर्ट मर्डोकला सांगितले की हा एक घोटाळा आहे, त्यांनी ही बनावट कथा प्रकाशित करू नये, परंतु त्यांनी ती प्रकाशित केली. आता मी त्यांच्यावर आणि त्यांच्या घृणास्पद वृत्तपत्रावर खटला भरणार आहे."
ट्रम्प यांनी असेही म्हटले की मर्डोक यांनी या प्रकरणाची चौकशी करण्याचे आश्वासन दिले होते. "मर्डोक म्हणाले की ते या प्रकरणाची चौकशी करतील, परंतु असे करण्याचा अधिकार त्यांना नाही असे दिसते. त्याऐवजी, ते खोटी, दुर्भावनापूर्ण आणि बदनामीकारक कथा प्रकाशित करत आहेत,"
ट्रम्प आणि एपस्टाईन प्रकरण काय आहे?
जेफ्री एपस्टाईन, एक श्रीमंत अमेरिकन फायनान्सर वर २००६ मध्ये लैंगिक गुन्ह्यांचा आरोप लावण्यात आला होता, त्याने फ्लोरिडा येथील एका १४ वर्षांच्या मुलीच्या घरी तिच्यावर विनयभंग केला होता. संबंधित मुलीच्या पालकांच्या तक्रारीनंतर त्याच्यावर पोलीस कारवाई झाली. त्यानंतर त्याला सुमारे १३ महिने तुरुंगवास भोगावा लागला.
त्यानंतर, जुलै २०१९ मध्ये, त्याला पुन्हा न्यू यॉर्कमध्ये अटक करण्यात आली आणि पैशाच्या बदल्यात तब्बल १२ मुलींची तस्करी आणि त्यांच्याशी लैंगिक संबंध ठेवल्याचा आरोप ठेवण्यात आला. मात्र या दरम्यान एपस्टाईनने त्याच्यावरील हे आरोप फेटाळले. १० ऑगस्ट २०१९ रोजी, तो तुरुंगात असताना, त्याने गळफास लावून आत्महत्या केली. या प्रकरणात काहींना असे वाटते की अधिकारी एपस्टाईन प्रकरणाशी संबंधित श्रीमंत आणि शक्तिशाली लोकांना, ज्यात ट्रम्प यांचाही समावेश आहे, त्यांना वाचवण्यासाठी त्याबद्दलची माहिती लपवत आहेत.
तथाकथित एपस्टाईन फाइल्सच्या सुटकेसाठीच्या आवाहनांना दडपण्यासाठी ट्रम्प प्रशासनाचे प्रयत्न मोठ्या प्रमाणात अपयशी ठरले आहेत. गेल्या आठवड्यात न्याय विभाग आणि एफबीआयने दिलेल्या मेमोमध्ये म्हटले होते की एपस्टाईन फाइल्समध्ये पुढील तपासाला समर्थन देणारे पुरावे नाहीत. मेमोमुळे दोन्ही एजन्सींच्या प्रमुखांना राजीनामा देण्याचे आवाहन करण्यात आले.