गडचिरोली : आजच्या काळात सर्व पालक आपल्या मुलांना इंग्रजी माध्यमाच्या शाळेत शिक्षण देण्याच्या तयारीत असतात , अनेक सरकारी अधिकारी , लोकप्रतिनिधी , कर्मचारी आणि इतर नागरिक हे आपल्या मुलांना इंग्रजी माध्यमातून शिक्षण देण्यासाठी धडपड करत असतात . त्यासाठी ते वाटेल तेवढे शुल्क देण्यासाठी तयार असतात . अगदी मध्यम वर्गीय नागरिक सुद्धा कर्ज काढून आपल्या मुलांना इंग्रजी माध्यमांच्या शाळेत शिक्षण घेण्यासाठी पाठवतात . याचे महत्वाचे कारण म्हणजे सरकारी शाळांमधील अपुऱ्या सुविधा आणि इंग्रजी भाषेची वाढलेली क्रेझ .या वातावरणात आमगाव देवरी विधानसभा मतदार संघाचे भाजपा आमदार संजय पुराम यांनी एक महत्वाचा निर्णय घेतला आहे . संजय पुराम यांनी आपल्या लेकीला शासकीय आश्रम शाळेत घातले आहे .त्यांच्या या निर्णयाची आता सर्वत्र चर्चा होत आहे .
इंग्रजी माध्यमातील शिक्षण म्हणजे आपल्या मुलांसाठी सर्वकाही असा समाज अनेक पालकांनी करून घेतला आहे . मोठ्या अधिकाऱ्यांपासून ते अगदी मध्यमवर्गियांपर्यंत सर्वजण आपल्या मुलांना चांगले शिक्षण देण्यासाठी खासगी शाळेत मुलांचे नाव दाखल करतात. त्यासाठी लाखो रुपये खर्च करतात. परंतु आमगाव देवरी विधानसभेचे आमदार संजय पुराम यांनी एक प्रेरणादायी निर्णय घेतला आहे . संजय पुराम यांनी आपल्या मुलीला गडचिरोली जिल्ह्यातील पुराडा गावात असलेल्या आदिवासी विकास विभागाच्या सरकारी आश्रमशाळेत घातले आहे.हा निर्णय घेऊन त्यांनी सर्व पालकांसमोरच नव्हे तर संपूर्ण महाराष्ट्रपुढे एक आदर्श ठेवला आहे . त्यांच्या या निर्णयाने सरकारी शाळांचा कायापालट होण्यास मदत होईल , आणि इतर पालक देखील आपल्या मुलांना सरकारी शाळेत दाखल करण्यास प्रवृत्त होतील .
विशेष म्हणजे,आमदार संजय पुराम यांनी स्वतःही आश्रम शाळेतूनच शिक्षण घेतले आहे. त्यांनी आपला मोठा मुलगा बिरसा संजय पुराम यालाही पहिल्या वर्गापासून बारावीपर्यंत पुराडा येथील आदिवासी आश्रम शाळेतच शिकवले. आता त्यांची लहान मुलगी समृद्धीलाही त्यांनी याच शाळेत घालून , सरकारी शाळांवर विश्वास दाखवला आहे.
जर याच पद्धतीने महाराष्ट्रातील आणि देशातील सर्व पदाधिकारी आणि लोकप्रतिनिधींनी आपल्या मुलांना सरकारी शाळांमध्ये दाखल केले, तर सरकारी शाळांचा कायापालट होईल . सरकारी शाळांमध्येही दर्जेदार आणि उत्तम शिक्षण मिळू शकेल. तसेच कोणालाही आपल्या मुलांना खासगी किंवा इंग्रजी माध्यमांच्या शाळांमध्ये घालून लाखो रुपये खर्च करण्याची गरज भासणार नाही .