मुंबई : प्रचंड तोट्यात असलेल्या महाराष्ट्र राज्य परिवहन महामंडळाकडून श्वेतपत्रिका सोमवारी (दि. २३ जून) जाहीर करणार आहे. यात एसटी महामंडळाची आर्थिक स्थिती समजून घेण्यासाठी व भविष्यातील नियोजनासाठी श्वेतपत्रिका महत्त्वाची ठरणार असल्याचे परिवहन मंत्री व एसटी महामंडळाचे अध्यक्ष प्रताप सरनाईक यांनी स्पष्ट केले.
एसटी महामंडळाचा तोटा आजच्या घडीला १० हजार कोटींच्या वर गेल्याने महामंडळाला कर्मचाऱ्यांचे वेतन, वाहन खरेदी, टायर खरेदी, इंधन खरेदी, स्थानकांचे नूतनीकरण व इतर आस्थापना खर्चासाठी आर्थिक कसरत करावी लागत असून सरकार दरबारी हात पसरावे लागत आहे. कर्मचाऱ्यांची देणी, पीएफ निधीचे हप्ते, कामगार करारातील प्रलंबित देणी यासाठी महामंडळाला पैशाची गरज आहे.
महामंडळाला इंधन, वस्तू व सेवा पुरविणाऱ्या संस्थांची थकीत देणीही द्यायची आहेत. याचा विचार करून एसटी महामंडळाची सध्याची आर्थिक परिस्थिती श्वेतपत्रिकेतून जाहीर करण्याची मागणी महाराष्ट्र एसटी कर्मचारी काँग्रेसचे सरचिटणीस श्रीरंग बरगे यांनी केली होती. यावर ही श्वेतपत्रिका काढण्याचे आदेश परिवहन मंत्री सरनाईक यांनी एप्रिल महिन्यात दिले होते. त्यानुसार सोमवारी ती महामंडळाकडून जारी करण्यात येणार आहे.