अहमदाबाद येथे झालेल्या विमान अपघातात मृत्युमुखी पडलेल्या प्रवाशांचे मृतदेह कुटुंबांकडे सुपूर्द केले जात आहेत. मात्र या भयानक अपघातात अनेक मृतदेह ओळखण्यापलीकडच्या अवस्थेत असल्याकारणामुळे, प्रवाशांच्या नातेवाईकांच्या DNA टेस्टद्वारे मृतदेहाची ओळख पटवली जात आहे. दरम्यान या अपघातात मृत्यू झालेल्या अदनान मास्टर यांच्या मृतदेहाची ओळख पटवण्यासाठी, त्यांच्या नवजात बालकाच्या डीएनएचे नमुने घेण्यात आले असल्याची माहिती समोर आली आहे.
गुरुवारी अहमदाबाद येथून लंडनला प्रस्थान करणारे एअर इंडियाचे विमान उड्डाण करताच काही वेळेत खाली कोसळले. या अपघातात एकूण २७० लोकांचा मृत्यू झाला आहे. यामध्ये विमान ज्या इमारतीला जाऊन आदळले त्या इमारतीत असलेल्या लोकांचादेखील समावेश आहे. दरम्यान, महम्मद अदनान मास्टर यांचा देखील या विमान अपघातात दुर्दैवी मृत्यू झाला. अदनान मास्टर यांचा मृतदेह पूर्णपणे जळाल्याने त्यांची ओळख पटवणं कठीण जात होते. त्यामुळे त्यांच्या मृतदेहाची ओळख पटवण्यासाठी त्यांच्या अब्राहम या 8 महिन्यांच्या बाळाचे डीएनएचे नमुने घेण्यात आले आहे.
ईदसाठी भारतात आले होते अदनान यांचे कुटुंब
अदनान हे लंडनचे रहिवाशी होते. पत्नी मंदाशा आणि आपल्या 8 महिन्याच्या मुलासोबत ते भारतात आपल्या घरी कुटुंबीयांसोबत ईद साजरा करण्यासाठी आले होते. काही दिवसांच्या सुट्टीनंतर हे कुटुंब इंग्लंडला परतणार होते. त्यानुसार 21 जूनला अदनान मास्टर यांचं आठ महिन्याचं बाळ आणि त्यांची पत्नी लंडनला जाणार होते. तर अदनान यांनी महत्वाच्या कामासाठी 9 दिवस आधी म्हणजेच दिनांक 12 जून रोजी लंडनला जाण्यासाठी AI 171 मधून एकटेच प्रवास करत होते, आणि यादरम्यानच काळाने त्यांच्यावर झडप घातली. क्षणार्धात होत्याचे नव्हते झाले!
अहमदाबाद विमान अपघाताची चौकशी फॉरेन्सिक तज्ज्ञांकडून केली जात आहे. उच्च तापमानामुळे पुरावे नष्ट होण्याचा धोका आहे, ज्यामुळे वेगाने काम करणे आवश्यक असल्याचे तज्ज्ञांकडून सांगितले जात आहे. आतापर्यंत 2o5 डीएनए नमुने घेण्यात आले आहेत. जसेजसे मृतांचे नातेवाईक पोहोचले आहेत, तसे डीएनए टेस्ट केले जात आहेत. परदेशातील प्रवाशांचे देखील नातेवाईक अहमदाबादला पोहोचले आहेत. त्यांचेही डीएनए सॅम्पल घेतले जात आहेत. येत्या काही दिवसांत सर्व मृतदेहांची ओळख पटण्याची अपेक्षा आहे. यानंतर मृतांचा खरा अधिकृत आकडा जाहीर केला जाणार आहे.