मुंबई : एका महिलेची लोकल ट्रेनमध्ये राहिलेली सोन्याच्या दागिन्यांची बॅग वडाळा रेल्वे पोलिसांनी शोधून परत मिळवून दिली. त्या बॅगेत ४ लाखांचे सोन्याचे दागिने होते. मात्र रेल्वेच्या मदत क्रमांकावर संपर्क साधून लवकर प्रतिसाद न मिळाल्याने त्यांना मोठा मनस्ताप सहन करावा लागला.
साताऱ्यात राहणाऱ्या प्राजक्ता बावधाने यांनी कुर्ल्यावरून पनवेलला जाणारी ट्रेन पकडली. त्यांचा भाऊ उदय शिंदे हा पुरूषांच्या डब्यात होता तर प्राजक्ता या मुलासह महिलांच्या प्रथम श्रेणी डब्यात होत्या. सायंकाळी ६ वाजता ते मानसरोवर रेल्वे स्थानकात उतरले. त्यावेळी गडबडीत बॅग ट्रेनमध्येच विसरल्याचे प्राजक्ता यांच्या लक्षात आले. दुसऱ्या डब्यातून उतरलेला त्यांचा भाऊ उदय शिंदे याला त्यांनी हा प्रकार सांगितला. उदय शिंदे यांनी तात्काळ रेल्वेच्या हेल्पलाईनला संपर्क साधण्यास सुरवात केली. मात्र कुणी प्रतिसाद दिला नाही.
वडाळा रेल्वे पोलीस ठाण्याचे पोलीस हवालदार जाधव हे डॉकयार्ड रेल्वे स्थानकात होते. त्यांना या संदर्भात माहिती मिळताच त्यांनी ट्रेनमध्ये तपास केला. सुदैवाने ती बॅंग ट्रेनमधील रॅकवर सुरक्षित होती. त्या बॅगेतील दागिन्यांची पडताळणी करण्यात आली आणि प्राजक्ता बावधने यांच्याकडे बॅग सुपूर्द करण्यात आली, अशी माहिती वडाळा रेल्वे पोलीस ठाण्याचे वरिष्ठ पोलीस निरीक्षक अरशुद्दीन शेख यांनी दिली.