मोरोक्को सध्या दुष्काळ आणि आर्थिक आव्हानांशी संघर्ष करत आहे. या पार्श्वभूमीवर देशातील कमी होत चाललेल्या पशुधनाचे जतन करण्यासाठी कठोर निर्णय घेतल्याचे मोरोक्कोच्या राजाच्यावतीने सांगण्यात आले. मोरोक्कोचे राजे मोहाम्मेद सहावे यांनी देशात प्राण्यांच्या कत्तलीवर बंदी घालण्याचा आदेश जारी केला आहे. हा आदेश जारी होताच मोरोक्कोच्या प्रशासनाने बळीच्या प्राण्यांची विक्री रोखण्यासाठी पशुधन बाजार बंद करण्यास सुरुवात केली. मोरक्कोतील प्राण्यांची खरेदी - विक्री ठप्प झाली आहे.
प्राण्यांचे सौदे करण्यासाठी भरवले जाणारे आठवडी बाजार बंद करण्यात आले आहेत. प्राण्यांच्या विक्री किंवा कत्तलीशी संबंधित मेळाव्यांवर बंदी घालण्यात आली आहे. मोरोक्कोच्या राजाचे सैनिक आणि पोलीस घरोघरी जाऊन तपासणी करुन कत्तलीचे प्राणी आढळल्यास जप्त करत आहे. महानगरपालिकांच्या कत्तलखान्यांवर तात्पुरती बंदी घालण्यात आली आहे. मोरक्कोतच काही ठिकाणी प्राण्यांच्या कत्तलीच्या अवजारांच्या विक्रीवरही बंदी आहे.
मोरोक्कोमध्ये मागील सहा वर्षांपासून दुष्काळ आहे. या दुष्काळामुळे नागरिक प्राण्यांची कत्तल करुन त्यांचे मांस खाऊन जगत आहेत. यामुळे देशातील पशुधनात लक्षणीय घट होऊ लागली आहे. या पार्श्वभमीवर मोरोक्कोच्या राजाने पशुधनाच्या संरक्षणासाठी देशात प्राण्यांच्या कत्तलीवर बंदी घातली आहे. यंदा बकरी ईद निमित्त संपूर्ण देशाच्यावतीने राजे एकटेच बकऱ्याचा बळी देणार आहे. पण राजाच्या या निर्णयामुळे मोरोक्कोतील धर्मांध मुसलमान असलेल्या नागरिकांमध्ये नाराजी पसरली आहे. राजाने थेट धर्मात हस्तक्षेप करणे अयोग्य असल्याचे मत व्यक्त होत आहे.