मॉस्को : रशिया-युक्रेन संघर्ष पुन्हा एकदा धगधगू लागला आहे. अवघ्या ७२ तासांत युक्रेनने रशियावर दुसरा मोठा हल्ला करत क्रिमिया पूल पुन्हा उद्ध्वस्त केला आहे. रशिया आणि क्रिमियाला जोडणाऱ्या या महत्त्वाच्या पूलाखाली पाण्यात ११०० किलो स्फोटके लावून हा भयंकर हल्ला करण्यात आला.
या पुलावर २०२२ पासून आजवर तिसऱ्यांदा हल्ला झाला आहे. यापूर्वी १ जूनला युक्रेनने ड्रोनद्वारे रशियाचे पाच लष्करी तळ उडवले होते आणि ४१ लढाऊ विमाने नष्ट केल्याचा दावा केला होता.
यूक्रेनच्या सुरक्षा एजन्सी एसबीयूने अधिकृतपणे सांगितले की, मंगळवारी पहाटे ४.४४ वाजता खांबांवर स्फोट घडवून आणले गेले. या हल्ल्यामुळे पूल मोठ्या प्रमाणात नुकसानग्रस्त झाला. सकाळपासून संध्याकाळपर्यंत वाहतूक थांबवण्यात आली होती.
युक्रेनच्या ड्रोन हल्ल्यात रशियाची ४० हून अधिक बॉम्बर्स नष्ट! किव्ह: युक्रेनने रशियाच्या ओलेन्या आणि बेलाया या दोन महत्त्वाच्या हवाई तळांवर हल्ला ...
एसबीयू प्रमुख वासुल मलियूक यांनी याआधी १ जूनच्या हल्ल्यामुळे रशियाचे ७ अब्ज डॉलर्सचे नुकसान झाल्याचे सांगितले होते. आजचा पूलहल्लाही मलियूक यांच्या देखरेखीखालीच पार पडला.
क्रिमिया पूल म्हणजेच केर्च ब्रिज रशिया आणि क्रिमिया यांच्यासाठी धोरणात्मक दृष्टिकोनातून अत्यंत महत्त्वाचा आहे. २०१८ मध्ये बांधण्यात आलेल्या या पूलाद्वारे रशिया क्रिमियाशी लष्करी आणि आर्थिक दृष्टिकोनातून जोडलेला आहे. त्यामुळे युक्रेनसाठी हा पूल नष्ट करणे म्हणजे रशियन पुरवठा व्यवस्था आणि मनोबल दोन्ही उध्वस्त करणे होय.
हा पूल २०१४ मध्ये रशियाने क्रिमिया हडप केल्यानंतर स्थापन केला होता. परंतु युक्रेनसाठी आणि पाश्चिमात्य जगासाठी तो बेकायदेशीर अधिग्रहणाचे प्रतीक ठरतो. त्यामुळेच हा पूल उडवून देणे हे फक्त लष्करी नव्हे, तर राजकीय आणि मानसिक रणधुमाळीतही मोठे पाऊल मानले जात आहे.
युक्रेनच्या या जोरदार प्रतिहल्ल्यामुळे युद्ध पुन्हा तापत असल्याची स्पष्ट चिन्हं आहेत. पुढील काही दिवसांत संघर्ष अधिक गंभीर व निर्णायक वळणावर पोहोचण्याची शक्यता निर्माण झाली आहे.
