अहमदाबाद: आयपीएल 2025 (IPL 2025) चा अंतिम सामना आज अहमदाबादमधील नरेंद्र मोदी स्टेडियमवर खेळला जाणार आहे. तत्पूर्वी एक दुर्दैवी घटना घडली आहे. नरेंद्र मोदी स्टेडियमच्या मुख्य प्रवेशद्वाराबाहेर मोठा स्फोट झाल्याचे वृत्त आहे. सामना सुरू होण्यापूर्वीच स्टेडियमबाहेर सकाळच्या सुमारास अचानक झालेल्या मोठ्या धमाक्यामुळे सध्या भीतीचे वातावरण आहे.
आज अहमदाबादमधील नरेंद्र मोदी स्टेडियमवर रॉयल चॅलेंजर्स बंगळुरू आणि पंजाब किंग्ज यांच्यादरम्यान आयपीएल 2025चा अंतिम सामना रंगणार आहे. हा सामना आज संध्याकाळी रंगणार आहे, त्यामुळे सामना बघण्यासाठी येणाऱ्या प्रेक्षकांची दुपारपासूनच सुरुवात होणार आहे, पण त्यापूर्वीच स्टेडियमच्या मुख्य प्रवेशद्वाराबाहेर गॅस सिलिंडरचा भीषण स्फोट झाला. नरेंद्र मोदी स्टेडियमजवळच्या फूटपाथवर अन्न आणि पेय विकणाऱ्या लोकांच्या निष्काळजीपणामुळे हा स्फोट झाल्याची माहिती समोर आली आहे. पण सुदैवाने यात कोणतीही जीवितहानी झालेली नाही.
दरम्यान ही दुर्घटना सकाळी घडली त्यामुळे मोठी जीवितहानी झाली नाही, पण जर हा स्फोट सामनादरम्यान किंवा गर्दीच्या वेळी झाला असता तर काय गंभीर परिस्थिती निर्माण झाली असती, याची कल्पना देखील करवत नाही.
ऑपरेशन सिंदूर मोहिमेवर भव्य लेजर शो
दरम्यान आजच्या IPL समारोप समारंभासाठी बीसीसीआयने एक विशेष कार्यक्रम आयोजित केला आहे. ज्यामध्ये ऑपरेशन सिंदूरच्या भव्य यशाबद्दल बीसीसीआयद्वारे सैन्याच्या सन्मानार्थ नरेंद्र मोदी स्टेडियममध्ये एक विशेष कार्यक्रम आयोजित केला जाईल. या कार्यक्रमात भारतीय गायक एका खास लष्करी बँडसह देशभक्तीपर गाणी गातील. समारोप समारंभ देखील खूप खास असणार आहे. प्रसिद्ध गायक शंकर महादेवन भारतीय सशस्त्र दलांना अद्भुत आदरांजली अर्पण करतील. त्यांच्या सादरीकरणातून ऑपरेशन सिंदूरमध्ये सहभागी असलेल्या शूर सैनिकांचा सन्मान केला जाईल आणि पहलगाम हल्ल्यात प्राण गमावलेल्यांना श्रद्धांजली वाहण्यात येईल.