शहापूर : शहापूर तालुक्यातील पेंढरघोळ येथील प्रेम लहानू सदगीर हा १४ वर्षांचा मुलगा त्याच्या मित्रांसोबत क्रिकेट खेळत असताना सर्पदंश होऊन त्याचा मृत्यू झाल्याची धक्कादायक घटना घडली आहे. मुख्य म्हणजे शहापूर उपजिल्हा रूग्णालयात उपचारा दरम्यान मृत्यू झाल्याने उपजिल्हा रुग्णालयांचा मुद्दा ऐरणीवर आला आहे.
मंगळवारी संध्याकाळच्या सुमारास मित्रांसोबत प्रेम सदगीर हा क्रिकेट खेळत असतांना चेंडू झुडपात गेल्याने तो काढतांना साप चावल्याचे लक्षात आल्यावर त्याच्या पालकांनी तात्काळ त्याला रूग्णालयात उपचारासाठी दाखल केले. मात्र उपचारा दरम्यान प्रेमचा मृत्यू झाला.
एकुलत्या एक मुलाचा मृत्यू झाल्याने आई-वडीलांसह नातेवाईकांनी एकच हंबरडा फोडला या घटनेनंतर उपजिल्हा रूग्णालयात नातेवाईकांनी एकच गर्दी केली. दरम्यान नातेवाईकांनी डॉक्टरांच्या हलगर्जीपणामुळे मृत्यू झाल्याचा आरोप केला आहे. तर या ठिकाणी रुग्णाला रूग्णालयात आणल्यानंतर त्याच्यावर व्यवस्थित उपचार करण्यात आले होते. त्याचे सीसीटीव्ही फुटेज देखील आहेत मात्र दुर्दैवी घटना घडल्याचे डॉक्टरांचे म्हणणे आहे.