ठाणे: ठाण्यातील वागळे इस्टेटमधील किसननगर परिसरातील नंदादीप इमारतीचा भाग कोसळल्याची घटना (Building Collapses in Thane) घडली. पंचपरमेश्वर मंदिराजवळील नंदादीप या ५० वर्ष जुन्या इमारतीचा काही भाग कोसळला. या घटनेत कोणतीही जीवितहानी झाली नाही.
तीन मजली असलेल्या नंदादीप इमारतीच्या तिसऱ्या मजल्यावरील जिन्याची बाल्कनी आणि तीन छतांचा काही भाग रात्री अचानक कोसळला. घटनेची माहिती मिळताच ठाणे महापालिकेचे आपत्ती व्यवस्थापन विभागाचे कर्मचारी तत्काळ घटनास्थळी दाखल झाले.
इमारत अत्यंत धोकादायक स्थितीमध्ये
महाराष्ट्रात मान्सूनच्या मुसळधार पावसादरम्यान, ठाणे शहरात मंगळवारी पहाटे जुन्या इमारतीचा काही भाग कोसळला, ज्याला नागरी अधिकाऱ्यांनी यापूर्वीच धोकादायक म्हणून वर्गीकृत केले होते. ही घटना वागळे इस्टेट परिसरातील असून, भरपावसात नंदादीप इमारतीत पहाटे २.२५ वाजता ही दुर्घटना घडली. या घटनेनंतर इमारतीतील १७ कुटुंबांना तात्काळ स्थलांतरित करून सुरक्षित ठिकाणी हलवण्यात आले असल्याचे एका अधिकाऱ्याने सांगितले.
तसेच शेजारील दोन इमारतींतील रहिवाशांनाही सुरक्षित स्थळी जाण्याच्या सूचना देण्यात आल्या आहेत. या घटनेनंतर प्रभाग समिती आणि बांधकाम विभाग यांच्यामार्फत पुढील कार्यवाही सुरू असून, अशा जुनाट आणि धोकादायक इमारतींच्या स्थितीकडे लक्ष देणे किती गरजेचे आहे, हे या प्रकारावरून पुन्हा अधोरेखित झाले आहे.
