VI suffers outage : राज्यभरात व्हीआय नेटवर्कचा घोळ; युजर्सच्या हजारो तक्रारी! नेमकं कारण काय?

मुंबई : देशभरात नावाजलेली व्हीआय (Vodafone Idea) या प्रमुख दूरसंचार कंपनीने भारतात टप्प्याटप्प्याने 5G सेवा सुरू केली आहे. मात्र आज पहाटे व्हीआयच्या ग्राहकांना नेटवर्कचा (VI Network) मोठा सामना करावा लागला. मुंबई, पुणे, दिल्ली येथील व्हीआय सिम धारकांना मोबाईल इंटरनेट, कॉलिंग, ऑनलाईन पेमेंट अशा आवश्यक सेवा वापरताना अनेक अडचणी सहन कराव्या लागल्या. सकाळ सकाळीच होणाऱ्या या समस्यांमुळे वापरकर्त्यांकडून तीव्र संताप व्यक्त होत असून नेटवर्कबाबत हजारो तक्रारी दाखल झाल्या आहेत. (VI suffers outage)

नेमकं कारण काय?

शुक्रवारी पहाटे व्होडाफोन आयडियाच्या ग्राहकांना नेटवर्क खंडित झाल्याचा सामना करावा लागला, त्यामुळे दिल्ली एनसीआर, मुंबई आणि पुणे येथील वापरकर्त्यांना मोबाईल इंटरनेट वापरता येत नव्हते किंवा कॉल करता येत नव्हते. टेलिकॉम ऑपरेटरने तांत्रिक बिघाडामुळे हे व्यत्यय आल्याचे कंपनीने सांगितले. मात्र आता ही समस्या सोडवण्यात आली असून सर्व सेवा आता पूर्ववत करण्यात आल्या आहेत. दरम्यान, युजर्सना झालेल्या समस्यांबाबत कंपनीने दिलगिरी व्यक्त केली असून वापरकर्त्यांचे संयम आणि समजूतदारपणाबद्दल आभार मानले आहेत.

वापरकर्त्यांच्या तक्रारींमध्ये वाढ

डाउनडिटेक्टर आउटेज-ट्रॅकिंग प्लॅटफॉर्मनुसार, रात्री १२ वाजून ३० मिनिटांनंतर तक्रारी वाढू लागल्या आणि सुमारे १ वाजेपर्यंत १ हजार ८८० हून अधिक तक्रारी नोंदवल्या गेल्या. अनेक वापरकर्त्यांनी सोशल मीडियावर निराशा व्यक्त केली आणि म्हटले की त्यांना वन-टाइम पासवर्ड (ओटीपी) मिळू शकले नाहीत, ज्यामुळे ऑनलाइन बँकिंगसारख्या आवश्यक सेवांवर परिणाम होत आहे. इतरांनी असे नोंदवले की त्यांचे डिव्हाइस रीस्टार्ट करून किंवा व्ही अ‍ॅप अ‍ॅक्सेस करण्याचा प्रयत्न करून समस्या सुटली नाही.