Addressing the press meet with President @anuradisanayake. https://t.co/yX4QG8WI4E
— Narendra Modi (@narendramodi) April 5, 2025
पंतप्रधान नरेंद्र मोदी श्रीलंकेच्या दौऱ्यावर आहेत. या दौऱ्यात भारत आणि श्रीलंका यांच्यात संरक्षण आणि पायाभूत सुविधांसह अनेक करारांवर स्वाक्षऱ्या झाल्या. याप्रसंगी बोलताना, सबका साथ सबका विकास या दृष्टीकोनातून भारत कार्यरत असल्याचे पंतप्रधान मोदी म्हणाले. श्रीलंका हा फक्त भौगोलिकदृष्ट्या शेजारी देश नाही तर भारताचा चांगला मित्र देश आहे. याच कारणामुळे श्रीलंकेच्या कठीण काळात भारत ठामपणे श्रीलंकेच्या पाठीशी उभा राहिला आणि यापुढेही श्रीलंकेसोबत असेल, असेही पंतप्रधान मोदी म्हणाले.
राष्ट्रपती दिसानायके यांच्या हस्ते श्रीलंका मित्र विभूषण हा पुरस्कार स्वीकारताना मला आनंद होत आहे. हा पुरस्कार म्हणजे फक्त माझा नाही तर १४० कोटी भारतीयांचा गौरव आहे. ही आमच्यासाठई अभिमानाची बाब आहे; असे पंतप्रधान मोदी यांनी पुरस्कार स्वीकारल्यानंतर सांगितले.
भारत आणि श्रीलंका यांच्यातील मैत्रीला ऐतिहासिक बंध आहेत. दोन्ही देशांची मैत्री खूप जुनी आहे. भारतासाठी ही बाब महत्त्वाची आहे की एक शेजारी आणि मित्र म्हणून आम्ही कायम श्रीलंकेच्या पाठीशी आहोत आणि राहणार, असे पंतप्रधान मोदी म्हणाले.
कसा आहे श्रीलंकेचा सर्वोच्च नागरी सन्मान ?
पंतप्रधान नरेंद्र मोदी यांना श्रीलंकेचे अध्यक्ष अनुरा कुमार दिसानायके यांनी श्रीलंकेचा सर्वोच्च नागरी सन्मान मित्र विभूषण दिला. या पुरस्कारात दोन्ही राष्ट्रांच्या सांस्कृतिक परंपरांना आकार देणाऱ्या सामायिक बौद्ध वारशाला प्रतिबिंबित करणारे धर्मचक्र आहे. पुरस्काराच्या स्वरुपात दिलेल्या पदकात तांदळाच्या पेंढ्यांनी समजवलेला कलश आहे, जो समृद्धी आणि नाविन्याचे प्रतिक आहे. पुरस्कारात असलेली नवरत्ने ही दोन्ही देशांमधील अमूल्य आणि चिरस्थायी मैत्रीचे प्रतिनिधित्व करतात. पुरस्कारात एक आकर्षक कमळ आहे. पदकावर सूर्य आणि चंद्र आहेत. सूर्य आणि चंद्र अनादी काळापासून या विश्वात आहेत. ते कालातीत बंधन दर्शवितात. हे पदक भारत आणि श्रीलंका या दोन देशांतील प्राचीन आणि प्रदीर्घ काळापासून असलेले सांस्कृतिक आणि अध्यात्मिक संबंध सुंदररित्या सादर करते.