मुंबई : छत्रपती शिवाजी महाराजांचा अपमान करण्याचा आणि इतिहास संशोधक इंद्रजित सावंत यांनी धमकी दिल्याचा आरोप असलेल्या प्रशांत कोरटकरला कोल्हापूर पोलिसांनी तेलंगणा येथून अटक केली. कोरटकरला तेलंगणातून आणून जुना राजवाडा पोलीस ठाण्यात ठेवण्यात आले. थोड्याच वेळात त्याला न्यायालयात हजर केले जाईल. याआधी त्याची वैद्यकीय चाचणी केली जाईल. ही प्रक्रिया सुरू असतानाच कोरटकरच्या मुद्यावरुन राजकारण तापले आहे.
तेलंगणात प्रशांत कोरटकर एका काँग्रेस नेत्याच्या घरात लपला होता, असा गंभीर आरोप भारतीय जनता पार्टीचे आमदार परिणय फुके यांनी केला आहे. काँग्रेसने प्रशांत कोरटकरला वाचवण्याचे प्रयत्न केले. पण प्रशांत कोरटकरच्या संपर्कात असलेल्या एका व्यक्तीपर्यंत पोलीस पोहोचले. यामुळे तो नेमका कुठे लपला आहे, याची माहिती पोलिसांना मिळाली. या माहितीआधारे पोलिसांनी प्रशांत कोरटकर याला अटक केली आहे, असेही आमदार परिणय फुके यांनी सांगितले.
आमदार परिणय फुके यांच्या आरोपामुळे राजकारण तापले आहे. या विषयावर बोलताना काँग्रेस आमदारांनी बचावात्मक पवित्रा घेतला. परिणय फुके मुख्यमंत्री फडणवीस यांचे लाडके आमदार होण्यासाठी धडपडत असल्याचा आरोप विजय वडेट्टीवार यांनी केला. हा आरोप करताना वडेट्टीवार यांनी फुके यांचे आरोप फेटाळले नाही. कोरटकरला मदत केलेल्यांवर ठोस पुराव्यांच्याआधारे कारवाई करायला पाहिजे असेही वडेट्टीवार म्हणाले. पण पुरावे नसताना कोणीही प्रसिद्धीसाठी आरोप करणे योग्य नाही, अशी पुस्ती त्यांनी जोडली.