शिवसेना नेते संजय निरुपम यांचा गंभीर आरोप

मुंबई : स्टँडअप कॉमेडियन कुणाल कामराच्या (Kunal Kamra) अलीकडील उपमुख्यमंत्री एकनाथ शिंदे (Deputy Chief Minister Eknath Shinde) यांच्याविषयीच्या गाण्यावर राजकारण तापले आहे. या शोमध्ये त्याने महाराष्ट्राचे उपमुख्यमंत्री एकनाथ शिंदे यांच्याबद्दल कथित आक्षेपार्ह टिप्पणी केल्याचा आरोप आहे. या पार्श्वभूमीवर, शिवसेना नेते संजय निरुपम (Sanjay Nirupam) यांनी सोमवारी आरोप केला की, या शोसाठी बुकिंगचे पैसे मातोश्रीतून आले, जे माजी मुख्यमंत्री उद्धव ठाकरे यांचे निवासस्थान आहे. त्यांनी पुढे असेही सांगितले की, पोलीस या प्रकरणाची चौकशी करतील आणि शिवसैनिकही आपल्या स्तरावर तपास करतील.

कुणाल कामराने गाण्यामध्ये शिंदे यांच्याविषयी गद्दार असा शब्द वापरल्याने शिवसेना आक्रमक झाली आहे. मुख्यमंत्री देवेंद्र फडणवीस यांनीही कामरावर जोरदार प्रहार करत कारवाईचा इशारा दिला आहे. तर शिवसेना नेते संजय निरुपम यांनी काही फोटो दाखवत गंभीर आरोप केले आहेत. निरुपम यांच्या या आरोपानंतर महाराष्ट्राच्या राजकीय वर्तुळात खळबळ उडाली आहे. यावरून शिवसेना (शिंदे गट) आणि ठाकरे गट यांच्यात राजकीय संघर्ष अधिक चिघळण्याची चिन्हे आहेत.

संजय निरुपम यांनी सोमवारी माध्यमांशी बोलताना शिवसेना उद्धव बाळासाहेब ठाकरे पक्षाचे प्रमुख उद्धव ठाकरे यांच्यावर गंभीर आरोप केले. ते म्हणाले, कुणाल कामराने उबाठाची सुपारी घेत आमच्या नेत्यांविरोधात एवढा मोठा आरोप केला आहे. त्यामुळे शिवसैनिक संतप्त झाले आहेत. त्याचा एक नमुना खारमध्ये काल रात्री दिसला.

कुणाल कामरा हा संजय राऊत यांचा खास मित्र आहे. यापूर्वी हा कामरा काँग्रेसच्या इकोसिस्टीमचा सदस्य आहे. राहुल गांधींबरोबर फिरतो. सुप्रिया सुळे आणि शरद पवारांसोबतही त्यांच्या भेटीगाठी होतात, असे सांगताना निरुपम यांनी त्यांच्यासोबतचे कामराचे फोटोही दाखवले.

भारतात डावा विचार आता संपला आहे. त्यामध्ये काही बोलबच्चन आहेत, त्यापैकी कुणाल कामरा एक आहे. काँग्रेस आणि त्यांच्या सहकाऱ्यांकडून पैसे घेत नरेंद्र मोदी, अमित शाह यांच्याबद्दल व्हिडीओ बनवला आहे. ज्या स्टुडिओमध्ये त्याने शुटिंग केले त्यासाठीचा पैसा मातोश्रीतून आला होता. उद्धव ठाकरे आणि त्यांच्या सहकाऱ्यांनी पैसे दिले होते. त्यांच्याच सांगण्यावरून शिंदेंवर अत्यंत निकृष्ट पातळीवर टीका केली, असा आरोप निरुपम यांनी केला आहे.

जोपर्यंत त्याचे वक्तव्य मागे घेत नाही, कुणाल कामरा जोपर्यंत शिंदेंची माफी मागत नाही, तोपर्यंत आमचे आंदोलन सुरू राहील, असा इशाराही निरुपम यांनी दिला आहे. सुपारीबाज कुणाल कामराने आमचे नेते एकनाथ शिंदे यांच्याविषयी गद्दार शब्द उच्चारला आहे. हा जोक नाही, गंभीर आरोप आहे. २०२२ मध्ये ४० हून अधिक आमदारांनी उठाव केला, ती गद्दारी नव्हती. गद्दारी तर उध्दव ठाकरेंनी केली होती. हिंदुत्वाच्या विचारांशी, बाळासाहेबांच्या विचारांशी गद्दारी केली. भाजपासोबतची युती तोडून काँग्रेसशी आघाडी केली, ती गद्दारी होती, असेही निरुपम यांनी म्हटले.

संजय निरुपम यांनी काय म्हटले?

संजय निरुपम यांनी म्हटले की, “हा शो कुठून फंड केला गेला? त्याच्या बुकिंगचे पैसे कुठून आले? ही चौकशी झाली पाहिजे. माझ्याकडे आलेल्या माहितीनुसार, या शोचे पैसे मातोश्रीतून आले आहेत. जर हा आरोप खोटा असेल, तर उद्धव ठाकरे यांनी पुढे येऊन खुलासा करावा.”

तसेच, निरुपम यांनी पुढे सांगितले की, “या प्रकरणाची सखोल चौकशी करण्याची गरज आहे. पोलीस आपल्या पातळीवर तपास करतील, पण शिवसैनिकही त्यांच्या स्तरावर चौकशी करतील. महाराष्ट्राच्या राजकारणात द्वेष आणि द्वेषपूर्ण प्रचार होऊ नये, यासाठी ही चौकशी आवश्यक आहे.”

शिवसेना (ठाकरे गट) कडून अद्याप प्रतिक्रिया नाही

या आरोपांवर शिवसेना (ठाकरे गट) कडून अद्याप कोणतीही अधिकृत प्रतिक्रिया आलेली नाही.

कुणाल कामरा वादाच्या भोवऱ्यात

कुणाल कामरा हा आपल्या परखड राजकीय विनोदांसाठी प्रसिद्ध आहे. याआधीही त्याने पंतप्रधान नरेंद्र मोदी, भाजपा सरकार आणि विविध राजकीय नेत्यांवर टीका केली आहे. परंतु, या वेळेस त्याच्या कॉमेडी शोतील वक्तव्यामुळे शिवसेना (शिंदे गट) संतापला आहे.

पोलीस तपास आणि पुढील वाटचाल

हा वाद आता राजकीय वर्तुळात तापत आहे. पोलिसांकडून या शोच्या आर्थिक व्यवहारांवर चौकशी होण्याची शक्यता आहे. तसेच, शिवसैनिक आपल्या पद्धतीने तपास करतील, असे संजय निरुपम यांनी सूचित केले आहे.

दरम्यान, या प्रकरणाचा पुढील काय निष्कर्ष लागतो, हे पाहणे महत्त्वाचे ठरेल.