मुंबईत अल्पवयीन मुलीवर पाच जणांनी केले अत्याचार

मुंबई : पुण्याच्या स्वारगेट एसटी डेपोतील रिकाम्या आणि दिवे बंद असलेल्या बसमध्ये अत्याचार करण्यात आल्याची तक्रार तरुणीने पोलिसांकडे नोंदवली. या घटनेला काही दिवस उलटत नाहीत तोच मुंबईतील जोगेश्वरीत एसी मेकॅनिक असलेल्या पाच नराधमांनी अल्पवयीन मुलीवर अत्याचार केले. या प्रकरणी पोलिसांनी आरोपींना पकडले असून त्यांच्या विरोधात पॉक्सोअंतर्गत (POCSO Act or Protection of Children from Sexual Offences Act) गुन्हा नोंदवला आहे.



सामूहिक लैंगिक अत्याचार केल्यानंतर आरोपींनी अल्पवयीन मुलीला जोगेश्वरी येथून जबरदस्तीने दादरला आणून सोडले. मुलीची अवस्था बघून दादरमध्ये पोलिसांनी तिची चौकशी केली. पोलिसांना बघितल्यावर मुलीने धाडस करुन माहिती दिली. यानंतर पोलिसांनी तातडीने कारवाई करुन नराधमांना पकडले. पोलीस या प्रकरणी तपास करत आहेत. मुलीची आणि पकडलेल्या पाच जणांची आधीपासून ओळख होती का ? ही बाब पण तपासली जात आहे. पण राज्यात लागोपाठ घडत असलेल्या या घटनांमुळे महिला सुरक्षेचा प्रश्न पुन्हा एकदा गंभीर झाला आहे. अर्थसंकल्पीय अधिवेशनाच्या निमित्ताने विरोधक या मुद्यावर सत्ताधाऱ्यांना जाब विचारण्याची शक्यता आहे.