मागील चौकशीला उपस्थित न राहिल्याने नाईक दाम्पत्यांना पुन्हा नोटीस
कणकवली : माजी आमदार वैभव नाईक व त्यांच्या पत्नी स्नेहा वैभव नाईक यांची लाचलुचपत प्रतिबंधक विभागाकडून चौकशी सुरू असताना,पुन्हा त्यांना लाचलुचपत प्रतिबंधक विभागाकडून रत्नागिरी येथील कार्यालयात उपस्थित राहण्याबाबत नोटीस बजावण्यात आली आहे. मंगळवारी ११ फेब्रुवारी रोजी कार्यालयात उपस्थित राहावे अशी नोटीस बजावण्यात आल्याने शिवसेना ठाकरे गटात पुन्हा एकदा खळबळ उडाली आहे.
याआधी वैभव नाईक हे आमदार असताना त्यांना चौकशीची नोटीस आली होती. त्यानंतर त्यांच्या कणकवलीतील राहत्या घराची व अन्य मालमत्तांची मोजमाप देखील लाचलुचपत प्रतिबंधक विभागाच्या मार्फत सार्वजनिक बांधकाम विभागामार्फतच्या वतीने घेण्यात आली होती. त्यानंतर नाईक यांना पुन्हा नोटीस आली आहे.
वैभव नाईक यांना लाचलुचपत प्रतिबंधक विभागाकडून दिलेल्या नोटीसमध्ये म्हटले आहे की,मालमत्तेच्या अनुषंगाने लाचलुचपत प्रतिबंधक विभाग,रत्नागिरी कार्यालयाकडून उघड चौकशी क्रमांक ०१/२०२२ करण्यात येत आहे.सदर उघड चौकशीच्या अनुषंगाने आपण ०५ डिसेंबर २०२२ रोजी लाचलुचपत प्रतिबंधक कार्यालय रत्नागिरी येथे स्नेहा वैभव नाईक यांच्या सहित उपस्थित राहिले होते. परंतू लोकप्रतिनिधी कालावधीतील आपली मालमत्ता, उत्पन्न व खर्च याबाबत परिपूर्ण माहिती त्यावेळी उपलब्ध नसल्याने सदर माहिती आपण मागाहून सादर करणार असल्याबाबत सांगितल्याने तसा त्यावेळी प्राथमिक स्वरुपात आपला जबाब नोंदविण्यात आला होता. उघड चौकशीच्या अनुषंगाने माहिती व आवश्यक कागदपत्रांसह अनुक्रमे दि.०३ जानेवारी २०२३ रोजी आणि दि. २८ जून २०२३ रोजी उपस्थित रहाणेबाबत त्यांना या कार्यालयाकडून कळविण्यात आले होते. मात्र आपण उपस्थित न राहता २८जून २०२३ रोजी आपले अकाउंटंट अमोल पुरुषोत्तम केरकर हे उपस्थित राहिले. परंतू त्यांनी आणलेली कागदपत्रे परिपुर्ण नसल्याने ती न देता, काही कालावधी नंतर आपले उपस्थितीत सदरची कादगपत्रे हजर करु असे पत्र त्यांनी या कार्यालयास दिलेले आहे. परंतु त्यानंतर अद्याप आपलेकडून कागदपत्रांबाबत पुर्तता झालेली नाही. अगर आपण उपस्थित राहिले नाहीत.
कोकण विकासाच्या जबाबदारीसाठी आम्ही कटीबद्ध- आमदार निलेश राणे
तरी लाचलुचपत प्रतिबंधक विभाग, रत्नागिरी कार्यालयाकडून आपले मालमत्तेच्या सुरु असलेल्या उघड चौकशीचे अनुषंगाने आपले स्वतःचे,आपली पत्नी स्नेहा यांचे तसेच एचयुएफ व नाईक स्टोन इंडस्ट्रीज यांचे १ जानेवारी २००२ ते २९ सप्टेंबर २०२२ या कालावधीतील उत्पन्न, खर्च व मालमत्ता याबाबतची आवश्यक ती परिपुर्ण माहिती आपणास या कार्यालयाकडून देण्यात आलेल्या मालमत्ता व दायित्वाचे १ ते ६ फॉर्ममध्ये भरुन तसेच सदर कालावधीतील आयकर विवरणपत्रे, ऑडीट रिपोर्ट,कॉम्प्युटेशन ऑफ इन्कम,शेडयुल बॅलन्सशीट, प्रॉफीट अॅन्ड लॉस अकाऊंट डिटेल्स शेडयुल व त्यासंबधीत कागदपत्रांसह आपण दिनांक ११फेब्रुवारी २०२५ रोजी सकाळी ११.०० वाजता पोलीस उप अधीक्षक, लाचलुचपत प्रतिबंधक विभाग, रत्नागिरी कार्यालय नाचणे रोड, मारुती मंदीर येथे उपस्थित रहावे, असे या नोटीसमध्ये म्हटले आहे.