नवी दिल्ली: दिल्लीतील विधानसभा निवडणुकीच्या(Delhi Assembly Election) तारखांची आज घोषणा होत आहे. निवडणूक आयोग दुपारी २ वाजता पत्रकार परिषद घेणार असून यावेळेस तारखांची घोषणा केली जाणार आहे. दिल्लीतील ७० विधानसभेच्या जागांसाठी फेब्रुवारी महिन्यात निवडणुका होऊ शकतात.
निवडणूक एकाच टप्प्यात होणार असल्याचे बोलले जात आहे. यावेळेसही दिल्लीत आम आदमी पक्ष, भारतीय जनता पक्ष आणि काँग्रेस यांच्यात सामना पाहायला मिळेल. याआधी सोमवारी निवडणूक आयोगाने शेवटची मतदार यादी जाहीर केली होती. दिल्लीत यावेळेस एकूण १ कोटी ५५ लाख २४ हजार ८५८ मतदार आहेत. निवडणूक आयोगाच्या माहितीनुसार दिल्लीत यावेळेस एकूण १.५५ कोटींपेक्षा अधिक मतदार असतील. यात पुरुष मतदारांची संख्या ८३,४९, ६४५ आणि महिला मतदारांची संख्या ७१, ७३,९५२ इतकी आहे. तर तृतीयपंथी मतदारांची संख्या १२६१ आहे.
निवडणूक आयोगाने सोमवारी दिल्लीतील मतदाराची शेवटची यादी जाहीर केली होती. यासोबतच मतदार यादीतून मतदारांचे नाव वगळल्याचा आरोप केला जात आहे. काही दिवसांपूर्व माजी मुख्यमंत्री अरविंद केजरीवाल यांनी पत्रकार परिषद घेत भाजपवर मतदार यादीतून मतदारांची नावे वगळल्याचा आरोप केला होता.
दिल्लीतील याआधीचा निकाल
दिल्लीमध्ये गेल्या दोन विधानसभा निवडणुकीत आम आदमी पक्षाने ७० पैकी ६० जागा जिंकत सरकार स्थापन केले होते. २०१५च्या निवडणुकी आम आदमी पक्षाने ६७ जागा जिंकल्या होत्या. दिल्लीच्या इतिहासात एखाद्या पक्षाने पहिल्यांदाच इतक्या जागा जिंकल्या होत्या.