काव्यरंग : ऋतु हिरवा ऋतु बरवा

ऋतु हिरवा ऋतु बरवा
पाचूचा वनि रुजवा
युगविरही हृदयावर सरसरतो मधूशिरवा

भिजुनी उन्हे चमचमती
क्षण दिपती क्षण लपती
नितळ निळ्या अवकाशी मधुगंधी तरल हवा

मनभावन हा श्रावण
प्रियसाजण हा श्रावण
भिजवी तन भिजवी मन हा श्रावण
थरथरत्या अधरांवर प्रणयी संकेत नवा

नभी उमटे इंद्रधनू
मदनाचे चाप जणू
गगनाशी धरणीचा जुळवितसे सहज दुवा

गीत - शांता शेळके
स्वर - आशा भोसले

मेंदीच्या पानांवर

मेंदीच्या पानांवर मन अजून झुलतेऽ गं
जाईच्या पाकळ्यांस दंव अजून सलतेऽ गं

झुळझुळतो अंगणात तोच गार वाराऽ गं
हुळहुळतो तुळशीचा अजून देह साराऽ गं
अजून तुझे हळदीचे अंग अंग पिवळेऽ गं
अजून तुझ्या डोळ्यांतील मोठेपण कवळेऽ गं

गीत - सुरेश भट
स्वर - लता मंगेशकर