मुंबई: भारताचा क्रिकेटर श्रेयस अय्यर आणि त्याची आई रोहिणी अय्यरने मुंबईमध्ये आलिशान अपार्टमेंट खरेदी केले आहे. याची किंमत २.९० कोटी रूपये सांगितली जात आहे. मिडिया रिपोर्ट्सनुसार हे अपार्टमेंट मुंबईच्या वरळी भागात आहे. रिपोर्टनुसार १९ सप्टेंबरला प्रॉपर्टीचे रजिस्ट्रेशन झाले होते. श्रेयस अय्यरबाबत बोलायचे झाल्यास त्याला नुकतेच इराणी कप २०२४ साठी मुंबईच्या संघात निवडण्यात आले आहे.
रिपोर्टनुसार श्रेयस अय्यरचे हे नवे अपार्टमेंट वरळीच्या आदर्श नगरमध्ये त्रिवेणी इंडस्ट्रीयल सीएचएसएलच्या दुसऱ्या मजल्यावर आहे. ५२५ स्क्वे फूट एरिया आहे. ही प्रॉपर्टी त्यांनी ५५,२३८ रूपये प्रती स्क्वे फुटाने खरेदी केली आहे.
मुंबईत आधीही खरेदी केले आहे घर
ही काही पहिलीच वेळ नाही जेव्हा श्रेयस अय्यरने रिअल इस्टेटमध्ये पैसे गुंतवले आहेत. त्याने मुंबईतील सर्वात उंच इमारतींपैकी एक लोढा वर्ल्ड टॉवर्समध्येही घर खरेदी केले आहे. त्याने सप्टेंबर २०२०मध्ये द वर्ल्ड टॉवर्सच्या ४८व्या मजल्यावर २३८० स्क्वे फुटाचे घर खरेदी केले होते. या अपार्टमेंटमध्ये ३ कार पार्किंगची सुविधा उपलब्ध आहे तर जुलै २०२४मध्ये अय्यर त्या खेळाडूंच्या यादीत सामील झाला होता ज्यांनी मुंबईत कमर्शियल प्रॉपर्टी खरेदी केली आहे.
इराणी कपमध्ये खेळणार श्रेयस अय्यर
श्रेयस अय्यरला १ ऑक्टोबरपासून सुरू होणाऱ्या इराणी कपसाठी मुंबई विरुद्ध रेस्ट ऑफ इंडियाच्या सामन्यात मुंबईच्या संघाकडून निवडण्यात आले आहे. अय्यरला शेवटचे जानेवारी २०२४मध्ये भारतीय संघासाठी खेळताना पाहिले होते. त्यावेळेस भारत आणि इंग्लंड यांच्यात कसोटी मालिका सुरू होती. यानंतर डोमेस्टिक स्तरावर क्रिकेट न खेळल्याच्या कारणाने अय्यरला बीसीसीआयने सेंट्रल कॉन्ट्रॅक्टमधून बाहेर केले होते. आता अय्यर नियमितपणे डोमेस्टिक क्रिकेट खेळत आहे आणि टीम इंडियात पुनरागमनाची अपेक्षा लावून बसला आहे.