मराठी सिनेसृष्टीतले आणि सुपरस्टार म्हणजेच अभिनेते अशोक सराफ…. (Ashok Saraf) आजवर अशोक सराफ यांनी अनेक सुपरहिट चित्रपट, मालिका आणि नाटकांमध्ये भन्नाट काम केलंय. छोट्या पडद्यापासून मध्यंतरी काही दिवस ते दूर होते. मात्र आता छोटा पडदा गाजवायला ते पुन्हा एकदा सज्ज आहेत. लवकरच त्यांची नवी मालिका प्रेक्षकांच्या भेटीस येणार आहे. ‘येतोय महाराष्ट्राचा महानायक लवकरच…’, असं म्हणत या मालिकेचा पहिला दमदार प्रोमो समोर आला आहे. ‘कलर्स मराठी’च्या ‘अशोक मा.मा.’(Ashok Ma.Ma) या मालिकेच्या माध्यमातून अशोक मामा छोट्या पडद्यावर कमालीचं कमबॅक करणार आहेत.
अशोक सराफ यांची नवी मालिका
‘अशोक मा.मा.’ या मालिकेची ‘कलर्स मराठी’ने पहिली झलक प्रेक्षकांच्या समोर आणली आहे. या प्रोमोमुळे प्रेक्षकांमध्ये या मालिकेबद्दल कुतूहल निर्माण झालं आहे. मालिकेचा पहिला प्रोमो आऊट झाला असून, प्रेक्षकांसाठी एक खास सरप्राईज देण्यात आलं आहे. महाराष्ट्राचा महानायक टेलिव्हिजनचा पडदा व्यापून टाकायला परत येतोय. नुकताच ‘अशोक मा.मा.’ या मालिकेचा उत्कंठा वाढवणारा प्रोमो आऊट झाला आहे.
‘अशोक मा.मा.’ या मालिकेचा प्रोमो पाहताक्षणी काहीतर गूढ, थरारक असल्याचं जाणवतंय. अत्यंत शिस्तप्रिय, प्रत्येक गोष्टीची खबरदारी घेणारे, काटेकोरपणे वागणारे अशोक मामा यामध्ये दिसत आहेत. तसेच त्यांच्या आयुष्याचा फंडा म्हणजे ‘शिस्त म्हणजे शिस्त’ असल्याचं या प्रोमोमध्ये स्पष्ट होत आहे. मात्र त्यांच्या मिश्कील अंदाजाने सर्वांच्या चेहऱ्यावर ते हसू आणणार आहेत. प्रोमोतील शेवटच्या फ्रेममध्ये दारावर लावलेल्या नेम प्लेटमध्ये ‘अशोक मा.मा.’ असं पाहायला मिळतंय. एकंदरीतच अशोक मामा आणि मालिकेतील त्यांच्या पात्राचं नाव सारखंच आहे. अशोक सराफ यांच्यासोबतच आणखी कोणते कलाकार मालिकेत झळकणार?, याबाबत सर्वानांच उत्सुकता लागून आहे.
या मालिकेचा पहिला प्रोमो समोर आल्याने प्रेक्षकांची उत्सुकता आता शिगेला पोहोचली आहे. या मालिकेबाबत अशोक सराफ यांनी त्यांच्या भावना व्यक्त केल्या आहेत. मालिका खूपच मनोरंजक आहे. या मालिकेची कथा चिन्मय मांडलेकरने खूप चांगल्या पद्धतीने लिहिली आहे. ‘टन टना टन’ या मालिकेनंतर बऱ्याच वर्षांनी पुन्हा ‘कलर्स मराठी’ वाहिनीच्या माध्यमातून मी टेलिव्हिजनवर कमबॅक करत आहे. शूटिंग करताना खूप मजा येतेय. ही मालिका प्रेक्षकांनाही नक्कीच आवडेल, असं अशोक सराफ म्हणाले.