भंडारा : गणपती विसर्जन मिरवणूक बघण्यासाठी जीर्ण इमारतीवर चढून विसर्जनातील डी. जे. व झाक्यांचा आनंद घेत असतानाच अचानक जीर्ण इमारतीच्या टिनाचे छत कोसळून झालेल्या दुर्घटनेत तीस ते चाळीस महिला किरकोळ जखमी झाल्याची घटना भंडारा जिल्ह्याच्या लाखांदूर तालुक्यातील बारव्हा येथे घडली आहे.
लाखांदूर तालुक्यातील बारव्हा पेठ येथे सार्वजनिक गणेश उत्सव मंडळाचे वतीने गणेश उत्सव मोठया धुमधडाक्यात साजरा करण्यात आला. दहा दिवस विविध प्रकारचे कार्यक्रम साजरे करण्यात आले. गणरायाचे विसर्जनासाठी डी. जे. व विविधरंगी झाकी, लेझीमच्या तालावर भाविक भक्त थिरकत असतानाच अचानक जीर्ण इमारतीचे टिनाचे छत कोसळले. शेडच्या वर आणि खाली अनेक महिला उभ्या होत्या. त्यांच्यावर टिनाचे शेड कोसळले.
मात्र, सिमेंटचे छताखाली टिनाचे शेड असल्यामुळे महिला जखमी झाल्या. लागेच जमावाने सर्व टिनाचे शेड उचलून धरले व जखमींना तात्काळ उपचारासाठी प्राथमिक आरोग्य केंद्र बारव्हा येथे दाखल करण्यात आले. सर्व महिला किरकोळ जखमी असुन मोठी दुर्घटना टळली आहे.