हाजी शेख हत्या प्रकरणात आरोपींची वाढ!

चंद्रपूर : कोळसा तस्करीत डॉन समजल्या जाणाऱ्या कुख्यात हाजी शेख हत्या प्रकरणात काल सकाळी सुरेंद्र यादव या आरोपीला नागपुरातून अटक करण्यात आल्याने प्रकरणातील आरोपींची संख्या सहावर पोहचली आहे. दरम्यान ६ आरोपींना ५ दिवसांची पोलीस कोठडी मिळाली आहे. कुख्यात हाजी शेख वर सोमवारी दुपारी शहरातील एका हॉटेलमध्ये जेवण करत असताना आरोपींनी गोळ्या झाडल्या. सोबतच चाकूने देखील सपासप वार केले. गंभीर अवस्थेत शासकीय वैद्यकीय महाविद्यालयाच्या सामान्य रुग्णालयात दाखल करण्यात आले असता डॉक्टरांनी त्याला मृत घोषित केले.

या प्रकरणात पोलिसांनी सोमवारी सायंकाळपर्यंत मुख्य आरोपी समीर शेखसह राजेश मुलकलवार, प्रशांत उर्फ पशी मालवीनी, निलेश उर्फ पिंटू ढगे, श्रीकांत कदम या ५ आरोपींना अटक केली होती. त्यानंतर आणखी एक आरोपी सुरेंद्र यादव याला काल सकाळी नागपुरातून अटक करण्यात आली. त्यामुळे सध्या यातील आरोपींची संख्या सहा झाली. या सर्व आरोपींना चंद्रपूर प्रथम श्रेणी न्यायालयात पेश केले असता समीर शेखसह सर्वांना १७ ऑगस्टपर्यंत पोलीस कोठडी देण्यात आली आहे. तसेच यामध्ये आणखी आरोपी असू शकतील अशीही शक्यता वर्तविली जात आहे.