Mumbai News : लालबागमध्ये गॅस सिलिंडरचा भीषण स्फोट! ४ जण गंभीर जखमी

लालबाग : दोन दिवसांपूर्वी मुंबईतील (Mumbai) विक्रोळी (Vikhroli) येथे गॅस सिलिंडरचा स्फोट (Gas Cylinder Blast) झाल्याची घटना घडली होती. यामध्ये एकाचा मृत्यू झाला असून आणखी एक जण गंभीर जखमी झाला होता. मुंबईतील सिलिंडर स्फोटाचे हे प्रकरण ताजे असताना पुन्हा आणखी एक अशीच घटना घडल्याचे समोर आले आहे. आज पहाटे ५ वाजेच्या सुमारास मुंबईमधील लालबाग परिसरात गॅस सिलिंडरचा (Lalbaug Cylinder Blast) स्फोट झाल्याची घटना घडली. यामध्ये ४ जण गंभीर जखमी झाले असून एकाची प्रकृती चिंताजनक असल्याची माहिती मिळत आहे. सध्या जखमींवर रुग्णालयात उपचार सुरु आहेत. मात्र सदरच्या घटनेमुळे परिसरात एकच खळबळ उडाली आहे.

मिळालेल्या माहितीनुसार, लालबागच्या डॉ. एस. एस राव रोडवरील मेघवाडी बिल्डिंग क्रमांक ३ मध्ये ही घटना घडली. या बिल्डिंगमध्ये राहणाऱ्या राणे यांच्या घरामध्ये पहाटे ५ च्या सुमारास गॅस सिलिंडरचा स्फोट झाला. यामुळे घराला मोठी आग लागली असून यामध्ये घरातील साहित्य, कपडे जळून खाक झाले. तसेच या स्फोटामध्ये चौघे जण जखमी झाले आहेत. दरम्यान, घटनेची माहिती मिळताच अग्निशमन दलाने तातडीने घटनास्थळी धाव घेत ही आगीवर नियंत्रण मिळवले.

जखमींची माहिती

गॅस सिलिंडरच्या स्फोटामध्ये एक महिला आणि तिची दोन मुले यांसह आणखी एक व्यक्ती जखमी झाले. कुंदा मिलिंद राणे (४८ वर्षे) ही महिला या स्फोटामध्ये ७० ते ८० टक्के जखमी झाली आहे. अथर्व मिलिंद राणे (१०) आणि वैष्णवी मिलिंद राणे (१०) हे १५ ते २० टक्के जखमी झाले आहेत. तर अनिकेत विलास डिचवलकर (२७) हा तरुण ६० ते ७० टक्के जखमी झाला आहे. यामधील कुंदा राणे आणि त्यांच्या दोन मुलांवर कस्तुरबा रुग्णालयात उपचार सुरू आहेत. तर अनिकेत डिचवलकरवर मसीना रुग्णालयात उपचार सुरू आहेत. या सर्व जखमींची प्रकृती चिंताजनक आहे.