दोन महाविद्यालयीन तरुणांचा जागीच मृत्यू
पुणे : पुण्यात (Pune) एका मद्यधुंद अवस्थेत असलेल्या अल्पवयीन मुलाने भरधाव वेगात पोर्शे कार चालवत दोन तरुणांना चिरडल्याच्या घटनेने सध्या खळबळ उडवून दिली आहे. हा मुलगा धनिकपुत्र असल्याने त्याला वाचवण्यासाठी अख्खी यंत्रणाच कशा प्रकारे कामाला लागली आहे, याचे रोज नवनवीन धक्कादायक खुलासे होत असतानाच आता आणखी एक अपघाताची घटना पुण्यातून (Pune Accident) समोर आली आहे. एका भरधाव ट्रकने एका दुचाकीला फरफटत नेल्याने दुचाकीवरील दोन महाविद्यालयीन तरुणांचा जागीच मृत्यू झाला. या घटनेने पुणे पुन्हा एकदा हादरलं आहे.
मालवाहतूक ट्रक वाघोलीतून पुण्याच्या दिशेने येत होता यावेळी खराडीतील जकात नाका चौकात हा अपघात घडला. काल रात्री साडेदहाच्या सुमारास भरधाव ट्रकने दुचाकीला चिरडले. त्यात दोन महाविद्यालयीन तरुणांचा मृत्यू झाला. हे दोन महाविद्यालयीन युवक मूळचे लातूरचे असून ते सध्या वाघोली येथे शिक्षण घेत होते, अशी माहिती पोलिसांनी दिली. याप्रकरणी ट्रक ड्रायव्हरला ताब्यात घेण्यात आले आहे. श्यामबाबू रामफळ गौतम असे चालकाचे नाव आहे.
पोलिसांनी दिलेल्या माहितीनुसार, गौतम हा त्याचा ट्रक (MH 12 VF 6441) घेऊन चंदन नगरच्या दिशेने जात होता. जकात नाका येथे सिग्नलवर थांबलेल्या मोटरसायकला त्याने मागून जोरात धडक दिली. त्यामध्ये मोटरसायकल वरील असणारे ३ जण फरफटत गेले. या अपघातात २ जणांचा मृत्यू झाला तर १ जण जखमी आहे.
आदिल शेख असे एका तरुणाचे नाव असून इतर दोघांचे नाव समजू शकलेले नाही. घटनास्थळावरून ट्रक चालक याला ताब्यात घेऊन त्याला ससून हॉस्पिटल येथे वैद्यकीय तपासणीसाठी नेले आहे. पुढील तपास पोलीस करत आहेत.