भाजप शहराध्यक्ष बंटी कुकडे मागणार न्यायालयात दाद
नागपुर : नागपूर येथील प्रत्येक विधानसभा मतदारसंघांमध्ये जवळपास प्रत्येकी १५ ते २० हजार अशा पद्धतीने नागपूर मधील लोकसभा मतदारसंघांमध्ये जवळपास दोन लाख मतदारांची नावे गहाळ झाल्याचा दावा आज (मंगळवार) भाजप शहराध्यक्ष बंटी कुकडे यांनी केला आहे. याबद्दल प्रशासकीय अधिकारी यांना निलंबित करावे अशी मागणी करत याबाबत प्रसंगी न्यायालयात दाद मागणार असल्याचे कुकडे यांनी माध्यमांशी बोलताना नमूद केले.
नागपुरात झालेला कमी मतदान आणि त्यासाठी मतदार याद्यांमधील गोंधळ जबाबदार असल्याच्या मुद्द्यावरून प्रशासनावर खापर फोडले जात आहे. हा सारा प्रकार निवडणूक निर्णय अधिकारी यांच्यामुळे झाल्याचा दावा करण्यात येत आहे. भाजप शहराध्यक्ष बंटी कुकडे यांनी पत्रकार परिषद घेत दोषींवर कारवाईची मागणी केली आहे.
कुकडे म्हणाले नागपूर लोकसभा मतदारसंघांत सुमारे २ लाखाच्या घरात मतदारांची नावे गहाळ झाली आहेत. प्रत्येक विधानसभा मतदारसंघांत सुमारे २० हजार नागरिकांना मतदानापासून वंचित राहावे लागले. ज्या मतदारांना मतदान करता आले नाही किंवा ज्यांना मतदानासाठी अनेक अडचणींना सामोरे जावे लागले अशा मतदारांकडून माहिती गोळा केली जात आहे. ही माहिती प्राप्त होताच प्रसंगी भाजप विधी आघाडीकडून न्यायालयात दाद मागणार आहोत, असेही बंटी कुकडे यांनी स्पष्ट केले.
