चालकाला फिट आली आणि...
पुणे : पुण्यातून (Pune news) गेल्या काही दिवसांत अनेक धक्कादायक बातम्या समोर येत आहेत. गुन्हेगारीसोबतच (Crime) पुण्यात अपघाताच्या घटनांमध्येही (Pune Accident) प्रचंड वाढ झाली आहे. आज पुण्यातील सर्वात जास्त रहदारी असलेल्या एम जी रोडजवळ (M G Road) एक अपघाताची घटना घडली आहे. एका चारचाकी वाहनाची सात ते आठ गाड्यांना जोरदार धडक बसली. यामुळे या गाड्यांचे मोठे नुकसान झाले आहे. या अपघातात एकजण किरकोळ जखमी झाला आहे.
मिळालेल्या माहितीनुसार, एक चार चाकी पुण्यातील एम जी रोड जवळील एका रस्त्यावरून जात होती. गाडी चालवत असताना त्या चालकाला अचानक फिट आली आणि त्याचे गाडीवरचे नियंत्रण सुटले. त्यामुळे समोर असलेल्या ७ ते ८ दुचाकी गाड्यांना ही धडक बसली. या अपघातात एक जण किरकोळ जखमी झाला.
या अपघातामुळे रस्त्यावर चांगलीच वाहतूक कोंडी झाली होती. काही वेळ वाहतूक थांबवावी लागली होती. या अपघाताप्रकरणी पोलिसांनी कारचालकाला ताब्यात घेतलं आहे. त्याच्यावर गुन्हा दाखल करण्याची प्रक्रिया सुरु आहे. पोलीस सगळ्या गाड्यांची पाहणी करत आहेत. मात्र यात गाड्यांचं मोठ्या प्रमाणात नुकसान झाल्याने अनेक चालक संतापलेले आहेत. शिवाय नागरिकांनी देखील पाहण्यासाठी गर्दी केली आहे.