क्रिकेटमधला रोमँटिक चेहरा काळाच्या पडद्याआड, सलीम दुर्रानी यांचे निधन

नवी दिल्ली: एकीकडे आयपीएलची धूम सुरु असतानाच आज भारतीय क्रिकेट जगतावर शोककळा पसरली आहे. टीम इंडियाचे माजी दिग्गज खेळाडू सलीम दुर्रानी यांचे आज सकाळी निधन झाले. ते ८८ वर्षांचे होते आणि कर्करोगाशी लढा देत होते. गुजरातमधील जामनगरमध्ये त्यांनी अखेरचा श्वास घेतला.

स्वत: च्या हँडसम लुक्सने एकेकाळी तरुणींना घायाळ करणाऱ्या सलीम दुर्रानी यांचा जन्म अफगाणिस्तानमध्ये झाला होता आणि ते अनेक वर्षे भारतासाठी क्रिकेट खेळले. त्यांनी बॉलीवुडमध्ये अभिनयही केला होता. यासह दुर्रानी हे अर्जुन पुरस्काराने सन्मानित होणारे पहिले भारतीय क्रिकेटपटू ठरले आहेत.

काबूलमध्ये जन्मलेल्या सलीम दुर्रानी यांनी १ जानेवारी १९६० रोजी ब्रेबॉर्न स्टेडियमवर ऑस्ट्रेलियाविरुद्ध भारताकडून कसोटीत पदार्पण केले. दुर्रानी यांनी जवळपास १३ वर्षे भारताकडून क्रिकेट खेळले आहे. यादरम्यान, त्यांनी २९ कसोटी सामन्यांमध्ये २५.०४ च्या सरासरीने फलंदाजी करत १२०२ धावा केल्या आहेत, ज्यामध्ये त्यांनी आपल्या बॅटने १ शतक आणि ७ अर्धशतके झळकावली. ते एक असे फलंदाज होते जो चाहत्यांच्या मागणीनुसार षटकार ठोकत असतं.

इतकेच नव्हे सलीम यांनी गोलंदाजीतही नाव कमावले आहे. डावखुऱ्या हाताचे फिरकी गोलंदाज असणाऱ्या दुर्रानी यांनी आपल्या आंतरराष्ट्रीय कारकिर्दीत ७५ विकेट्सही घेतल्या आहेत. सलीम दुर्रानी यांनी केवळ कसोटी क्रिकेटमध्ये भारताचे प्रतिनिधित्व केले आहे. त्यांनी शेवटची कसोटी ६ फेब्रुवारी १९७३ रोजी इंग्लंडविरुद्ध ब्रेबॉर्न स्टेडियमवर खेळली.

——–