मुरूड: मुरुडच्या ग्रामीण रुग्णालयात शहरातील लेडिकुलसूम बेगम हॉस्पिटलमध्ये आयोजित महाआरोग्य शिबिराला उत्स्फूर्त प्रतिसाद मिळाला. संकल्प निरोगी महाराष्ट्राचा या शासनाच्या योजने अंतर्गत या शिबिराचे आयोजन करण्यात आले होते.
सदर आरोग्य शिबिरात बाल आरोग्य तपासणी, जागृत पालक सुदृढ बालक या योजनांचा शुभारंभ सेवानिवृत्त अतिरिक्त जिल्हा आरोग्य अधिकारी डॉ मकबुल कोकाटे मान्यवरांच्या हस्ते करण्यात आला. यावेळी वैद्यकीय अधिकारी डॉ. निशिगंधा माळी यांनी आरोग्य योजनांची माहिती दिली. या शिबिरामध्ये नेत्ररोग चिकित्सा, दंतरोग चिकित्सा, रक्ताच्या तपासण्या व गरजूंना औषध वाटप करण्यात आले.
यावेळी संजीवनी आरोग्य सेवा संस्थेचे कार्याध्यक्ष विजय सुर्वे, शिवसेना शहरप्रमुख आदेश दांडेकर, वैद्यकीय अधिकारी डॉ.आदित्य वने, दंत शल्यचिकित्सक डॉ.शेखर वानखेडे व रुग्णालय कर्मचारी उपस्थित होते. या शिबिराला शहरातील नगरपरिषद प्राथमिक शाळेतील शालेय विद्यार्थ्यांचा मोठा प्रतिसाद लाभला. सर्व उपस्थितांचे वैद्यकीय अधिक्षक डॉ. उषा चोले यांनी स्वागत केले तर कार्यक्रमाचे सूत्रसंचालन व आभार विठ्ठल शिंदे यांनी मानले.