नाशिक (प्रतिनिधी) : राजकारणात केव्हा काहीही घडू शकते, असे म्हणून भाजपा - शिंदे गट आणि मनसे एकत्र येण्याबाबत प्रयत्न चालू असल्याचे संकेत राज्याचे ग्रामविकास मंत्री गिरीश महाजन यांनी दिले.
गिरीश महाजन हे शनिवारी नाशिक दौऱ्यावर आले होते, त्यावेळी पत्रकारांशी बोलताना त्यांनी सांगितले की, राज्याचे मुख्यमंत्री एकनाथ शिंदे, उपमुख्यमंत्री देवेंद्र फडणवीस आणि मनसे अध्यक्ष राज ठाकरे हे एका व्यासपीठावर आले, हे केवळ कार्यक्रमाचे निमित्त होते. यामध्ये कोणतेही राजकारण नव्हते. परंतु राजकारणात केव्हा काहीही घडू शकते, असे सांगून महाजन यांनी राज्यामध्ये होऊ घातलेल्या राजकीय उलथापालथीबाबत स्पष्ट संकेत दिले आहेत.
राज्यातील राजकीय परिस्थितीवर बोलताना गिरीश महाजन पुढे म्हणाले की, उद्धव ठाकरे यांचे विश्वासू स्वीय सहाय्यक मिलिंद नार्वेकर हे नाराज असल्याची चर्चा सध्या राजकीय वर्तुळात सुरू आहे. त्यातच नार्वेकर यांनी आज केंद्रीय गृहमंत्री अमित शाह यांना वाढदिवसाच्या शुभेच्छा दिल्यानंतर अधिकच उलटसुलट चर्चेला उधाण आले. मिलिंद नार्वेकर यांचे अमित शहा यांच्याशी चांगले संबंध आहेत. मी जे ऐकतोय त्यानुसार नार्वेकर शिवसेनेत नाराज आहेत. शिवसेनेत कोण राहील, अन कोण जाईल, हे सांगता येत नाही, असे महाजन यांनी म्हटले आहे.