नाशिक : आडगाव पोलिसांनी काल मध्यरात्री नाशिक बस अपघातातील संशयित चालक रामजी जगबिर यादव याला अटक केली आहे. नाशिक येथे शनिवारी सकाळी ट्रक आणि एका खासगी बसचा अपघात होऊन बसने पेट घेतल्याची दुर्घटना घडली होती. त्या अपघातात १२ लोकांचा मृत्यू झाला होता. तर जवळपास २५ ते ३० लोकं जखमी झाले होते. त्यानंतर ट्रक चालक फरार झाला होता. त्यानंतर पोलिसांनी त्याला अटक केली आहे. रामजी यादव असं आरोपी ड्रायव्हरचे नाव असून तो उत्तरप्रदेशचा रहिवाशी असल्याचे समोर आले आहे.
दरम्यान, काल पहाटे पाच ते साडेपाचच्या सुमारात नाशिक येथील नांदूर नाक्याजवळ अपघात झाला होता. या अपघातानंतर चिंतामणी ट्रॅव्हल्सच्या बसने पेट घेतला. त्यानंतर काही प्रवाशांनी गाडीतून उड्या मारून आपले जीव वाचवले होते तर काहीजणांचा होरपळून मृत्यू झाला होता. या भीषण अपघातानंतर ज्या ट्रकने या बसला धडक दिली होती त्या ट्रकचा ड्रायव्हर घटना स्थळावरून फरार झाला होता.
रामजी यादव असे त्या ड्रायव्हरचे नाव असून तो २७ वर्षाचा आहे. मुळचा उत्तरप्रदेशचा असलेल्या रामजी याला आडगाव पोलिसांनी अटक केली आहे. तर त्याच्याविरोधात गुन्हा दाखल केला आहे. त्याच्या विरोधात भारतीय दंड विधान कलम ३०४ अ २७९, ३३६, ३३७, ३३८, ४२७ नुसार सदोष मनुष्यवधाचा गुन्हा दाखल केला आहे. तसेच मोटर वाहन कायदा कलम १८४, १३४ अ ब अंतर्गत देखील गुन्हा दाखल केला आहे. अधिकचा तपास सुरू असल्याचे पोलिसांनी सांगितले आहे.