सांगलीत पालघरची पुनरावृत्ती टळली, मुलं चोरीच्या संशयावरून ४ साधूंना बेदम मारहाण

जत : सांगली जिल्ह्यातील जत तालुक्यातील लवंगे गावात मुलं चोरीच्या संशयावरून ४ साधूंना बेदम मारहाण करण्यात आली. मारहाणीचा व्हिडिओ व्हायरल झाल्यानंतर पोलिसांनी स्पष्टीकरण दिले आहे.

याप्रकरणी आतापर्यंत ६ जणांना अटक करण्यात आली आहे. तर सांगली पोलिसाकडून तपास सुरू आहे. सांगलीच्या पोलीस अधिक्षक दीक्षित गेडाम यांनी सांगितले की, हे चारही साधू यूपीचे रहिवासी असून ते पंढरपूरला दर्शनासाठी जात होते. येथील स्थानिक लोकांना त्यांची भाषा समजू शकली नाही, त्यामुळे लोकांनी त्यांना मूलं चोरणारे समजून मारहाण केली. लवंगा गावात काल उत्तर प्रदेशातील मथुरा येथील चार साधूंवर झालेल्या मारहाण प्रकरणी पोलिसांनी सहा आरोपींना अटक केली आहे. तसेच मारहाण केलेल्या उर्वरित लोकांचा शोध सुरू आहे, अशी माहिती सांगली जिल्हा पोलीस अधीक्षक दीक्षित गेडाम यांनी माध्यमांशी बोलताना दिली.

दरम्यान, मारहाण झालेल्या साधूंनी जमावाविरुद्ध कोणतीही तक्रार केलेली नाही, आणि ते पुढे विठ्ठल दर्शनासाठी पंढरपूरला निघाले. मात्र पोलिसांनी व्हिडिओच्या माध्यमातून दोषींवर कारवाई सुरू केली आहे.

पोलीस अधीक्षक दीक्षित गेडाम यांनी जनतेला कायदा हातात न घेण्याचे आवाहन केले आहे. कोणताही आक्षेपार्ह व्हिडिओ व्हायरल झाल्यास प्रथम पोलिसांना कळवा आणि कायदा हातात घेऊ नका, असे आवाहन त्यांनी केले आहे.